(Pamuhai ni Partangiangan Wijk)
HKBP Sukajadi Resort Sukajadi
Distrik XXII Riau - Pekanbaru
Parade diri manomunomu Jubileum 150 taon HKBP
01. Parade diri Manomunomu Jubileum 150 taon HKBP:
L: Hamuna angka dongan nahinaholongan dibagasan Kristus Tuhanta i. Nunga di tontuhon Pucuk Pimpinan ni Hurianta HKBP, ia taon 2011 on, i ma: TAHUN JUBILEUM 150 taon HKBP, terhitung mulai taon 1861 – 2011 on. Secara Nasional patupaonta ma i di bulan Oktober 2011 na ro. Alai andorang so sahat hita tusi, mansai ringkot do hita parade diri manomu-nomu Jubileum i marhite na manangianghon dohot na ma-numpahisa. Patupaonta ma rumang ni kegiatan di tingkat Huria, Resort, Distrik, Wilayah nang secara Nasional pe, asa tung tarida las ni roha dohot olopolop ni tondinta manghalashon Jubileum i. Nuaeng pe, marpadan ma hita tu dirinta laho patulushonsa:
HURIA:
Marolopolop tu Debata ma hita. Taendehon ma hamuliaon ni goarNa. Marmulia ma tabahen pujipujianNa. Tadok ma tu Debata: Tung na songkal do angka pambahenanMu. Binahen ni hinatimbul ni gogoM, ingkon marsomba tu Jahowa ma hita, jala taulahon nanidokNa.
L: Saluhutna silehonlehon na denggan dohot nasa ulibasa na mauliutus, na ro sian banua ginjang do i, sian Ama ni angka hatiuron, ndang adong anggo di Ibana manang halinu ni pangkusoran. Taingot ma! Na mamolus do portibi on rap dohot pinangido ni rohana, alai na mian ro di saleleng ni lelengna do na mangulahon lomo ni rohaNa. Halinu sambing do jolma i mardalani, alogo sambing do digulut-gulut, sai papunguhon do ibana, hape ndang diboto manang ise na mangahutisa muse. Molo songon i, aha ma dohononta di adopan ni Debata Pardenggan basa i?
HURIA:
Ditompa Debata ma roha na ias dibagasan hita, jala dipaimbaru ma tondi na marsihohot dibagasan hita, asa tung tarulahon hita lomo ni rohaNa. Godang ma tongon na binahen ni Jahowa tu hita, jadi marhilas jala marolopolop ma hita disi.
L: I do tutu. Masa ma di tingkim haporseaon, hinagok ni angka hatuaon, hapistaran dohot parbinotoan, biar mida Jahowa pangalapan arta di hita. Taingot ma! Angka na marhaposan tu Jahowa maruli hagogoon mardapot-dapot, gabe marhabong ni lali laho manaek. Marlojongi hita, ndang olo loja, mardalani hita na so jadi mandate. Antong! Sian nasa rohanta, tasombahon ma olopolop ni tondinta di na rap hita mangendehon: Marolopolop tondingki ai naung di tobus Jesus i…..!
SUDE: Mangendehon BE No. 435: 1 + 3 ”Marolopolop tondingki”
1. Marolopolop tondingki, ai naung ditobus Jesus i. Hamu sude bege ma i sai las rohangku mandok i. Sonang ni tingki i dung jumpang Jesus Tuhanki. TondiNa mangajari au, tarbaen marlas ni roha au. Sonang ni tingki i, dung jumpang Jesus Tuhanki. ~~jongjong~~
2. Tu Jesus sahat ngolungki saleleng ni lelengna i. Rap dohot au endehon ma endengku na imbaru da. Sonang ni.......!
02. VOTUM – INTROITUS – TANGIANG:
L: Marhitehite Goar ni Debata Ama, anakNa Tuhan Jesus Kristus dohot Tondi Parbadia, na manompa langit dohot tano on. Amen. Mandok mauliate ma hamu di Jahowa, ai na basa do Ibana, ai ro di salelenglelengna do Asi ni rohaNa i. Sai urupi ma hami ale Jahowa Debatanami, Sai tumpahi ma ngolunami hombar tu asi ni rohaM.
HURIA:
Tahalomohon ma pangajaran ni Jahowa, jadi lehononNa ma tu hita napinangido ni rohanta. Tapasahat ma dalanta tu Jahowa jala tahaposi ma Ibana asa Ibana paturehon.
L: Taoloi ma Jahowa marhitehite las ni roha, ro be ma hita tu joloNa marhitehite olopolop. Taboto ma: Jahowa do Debata; Ibana do na jumadihon hita, jala Ibana nampuna hita, bahen bangsoNa dohot birubiruNa.
SUDE:
Martua ma ganup na manghabiari Jahowa, na marparange di angka dalanNa i. Sai panganonta do na niula ni tanganta, martua ma hita jala sonang. Tapuji ma Jahowa, ai Pardenggan basa do Ibana; taendehon ma goarNa, ai hasudungan ni rohanta do Ibana.
L: Martangiang ma hita: Ale Tuhan Debata, huboto hami, ndada ala ni gogo dohot habisuhonnami umbahen tarbahen hami tolhas tu taon 2011 on; tung holan ala Asi ni rohaM sambing do. Hupasahat hami ma ngolunami tu Ho mandalani ariari na pinasahatMu tu hami di taon 2011 on. Manang dibagasan las ni roha manang arsak ni roha hami, holan Ho sambing ma huhaposi hami. Ala ni, tambai ma nang haporseaonnami, asa tongtong hami marsigantung tu Ho. Dinamangarade diri hami manomunomu Jubileum 150 taon HuriaM HKBP, hupagomgomhon hami ma ngolunami tu Ho, urupi jala pargogoi ma hami marhite tondiM, asa tulus marolopolop, mariaia tondinami sumombahon pasupasu nanilehonMi tu hami songon parbue ni haporseaonnami na sintong di adopanMu. Hupasahat hami ma tangiangnami on tu Ho, marhite Tuhan Jesus Kristus na pasadahon hami mandok mauliate tu adopanMu na badia i. Amen. ~~~ Hundul ma hita~~~
03. Koor: NHKBP Sukajadi (Remaja Pospel Exaudi)
04. MANJAHA TURPUK EPISTEL: Markus 4: 26 - 29
L: Hamuna angka dongan! Tajaha ma turpuk Epistel di pamuhai ni partangiangan Wijta di borngin on, i ma na tarsurat di Markus 4: 26 – 29, na mandok: Dung i didok ma: On ma pangalaho ni harajaon ni Debata: Songon pambahen ni halak na manaburhon boni tu haumana.
HURIA:
Na modom do ibana bornginna jala dungo ia arianna; na martumbur do anggo boni i laos marbuhutano, so pamotoan ni parhauma i.
L: Ai sian gogona sandiri dipatubu tano i jumolo hauna, dung i biurna, dung i eme na porngis i dibagasan biurna i.
SUDE:
Alai disi dilehon parbuena, mamintor disuru ma panabi, ai nunga ro gotilon.
L: Martua do angka na tumangihon Hata ni Debata, jala na umpeopsa. Amen.
05. Koor: Gabungan Ina NHKBP Sukajadi
06. Marende No. 707: 1 + 3 “Hagogoon dohot apulapul”
1. Hagogoon dohot apul-apul do dilehon Tuhan i tu au. Ganup ari au ditogutogu, ganup tingki di ondingi au. Ai hombar tu lomo ni rohaNa, do dilehon Tuhan i tu au. Ro marsorin arsak las ni roha, haporseaonku di patau.
3. Songon Ama do tu anakhonna, holong ni Tuhanta i tu au. Ndang mansadi pangurupionNa, hombar tu padanNa na tu au. Debata Amanta na di ginjang, i do haposanku sai tongtong. Dipangiringiring ni tanganNa dame sonang do rohangkinon.
07. TANGIANG PANGONDIANON (DOA SYAFAAT):
08. Koor: Ama Jeriko HKBP Sukajadi
09. Marende No 697:1 - 2 “Molo Ho do huihuthon”
1. Molo Ho do huihuthon, dame sonang rohangki, sai horas jala martua nasa na hinophopMi. Ref. Ho tongtong ihuthononku, Jesus na palua au. Ho sambing do oloanku alani martua au.
2. Hupelehon ma diringku mangihuthon lomoMi, ndada be na olo salpu na manggohi rohangki. Ho tongtong ihuthononku....!
10. Jamita: Heber 3: 15 - 19
11. Marende No. 714: 1 – 2 “Tuhan na marmahan hami”
(LAOS PASAHATHON PELEAN TU HURIA)
1. Tuhan na marmahan hami togu hami ruasMon. Lehon dameMi di hami angka na hinophopMon. Tuhan Jesus Sipalua, Parmahani ruasMon. Tuhan Jesus Sipalua, parmahani ruasmon.
2. Tuhan Parmahan haposan dongan na sumurung i. Sai padao pangunjunan togu ma na lilu i. Tuhan Jesus Sipalua, pasupasu ruasMi. Tuhan Jesus Sipalua, parmahani ruasMi.
12. TANGIANG PANGHIRIMON MANGULAHON HATA NI DEBATA:
L: Hamuna angka dongan na hinaholongan! Nunga marsaringar Hata ni Debata tu bagasan rohanta na mandok: "Sadari on, di na binegemuna soaraNa, unang ma papir hamu rohamuna, songon nasida na tangkang roha uju i. Taingot ma! Holan ala ni haporseaonta di Jesus Kristus do malua hita sian ragam ni dosa dohot hajahaton, ndang dibaloshon tu hita saluhutna dosanta. I do sihamauliatehonon ni rohanta dinapinaloasNa HuriaNa MARJUBILEUM 150 taon HKBP di taon 2011 on.
AMA:
Dipagomos Debata ma rohanta manundalhon dosa i, Dipaganda ma ringgasta mangulahon HataNa. Asa unang lalap rohanta di portibi on.
INA:
Sai diapuli Debata ma rohanta dohot holong ni rohaNa, jala dijalo tangiangta ala denggan ni basaNa. Dipadao sude jea sian ngolunta asa unang marsak hita, jala asa lam togu rohanta manghaporsai Ibana.
REMAJA/NAPOSO BULUNG:
Dipaian Debata ma HataNa i mangapuli rohata, dipadao sude pangago sian hita asa gok las ni rohanta mangoloi Ibana ganup ari.
L: Hamuna angka dongan! Pos ma rohanta di Debata, lehononNa do las ni roha dohot panghirimon na mangolu tu hita, nang pe marombas-ombas arsak nang las ni roha taadopi di taon naung salpu i. Alai dumenggan jala tumonggi ma daionta asi ni rohaNa di taon 2011 on. Ndang tarasam hita tahe denggan basa ni Jahowa mangaramoti HuriaNa sahat tu nanaeng patupa JUBILEUM 150 taon on. Songon i nang na mangaramoti ngolunta taripar tu taon 2011 on. Alani, patut tapuji Ibana jala taoloi na nidokNa. Nuaeng pe, tapahibul ma rohanta manombahon tangiang panghirimon ni rohanta mangulahon Hata ni Debata. Lambok ma taelekhon tu adopanNa nabadia i: “Sai unang jujur dosa i, binaen di taon na salpu i...”
~~~~Jongjong ma hita saluhutna~~~~~
SUDE: Mangendehon BE No. 70: 4 – 6” O Jesus Sipangolu au”
4. Sai unang jujur dosa i binaen di taon na salpu i. Urasi hami sasude asi rohaM di hami be. Urasi hami sasude, asi rohaM di hami be.
5. Urupi hami mangoloi PatikMu jala pargogoi. Lao manundalhon dosa i, nang nasa jat ni rohangki, lao manundahon dosa i, nang nasa jat ni rohangki.
6. Lam jonok taiti hami on tu hangoluan na tongtong. Pahot ma di huriaMi jambarna na sumurung i. Pahot ma di huriaMi, jambarna na sumurung i.
13. Tangiang Panutup: Ale Amanami – Pasupasu –
Amen 3X diendehon
Doc: letariushutabarat.blogspot.com
Tidak ada komentar:
Posting Komentar