Acara Parmingguon
Jubileum 150 Taon HKBP
di HKBP Sukajadi Ressort Sukajadi
Distrik XXII Riau – Pekanbaru
Pesta Parjolo Ari Haheheon ni Tuhan Jesus
Bahasa Batak
01. Jou-jou tu parsaoran na badia:
L: Hamuna angka dongan sahaporseaon! Dibagasan serep dohot unduk ni roha, tama do hita sadari on marlas ni roha jala mandok mauliate tu Debata, ala asi dohot holong ni rohaNa do na paloashon hita patupa Pesta Jubileum 150 taon HKBP na tahalashon di tingkat Huria sadari on.
H: Mauliate ma di Tuhan i na mangaramoti HuriaNa HKBP 150 taon sadari on. “Tapelehon ma tu Debata hamauliateon, jala tagarari ma baga-baganta tu na tumimbul i. Ai manang ise na mamelehon hamauliateon, i do na pasangaphon Debata, jala mambahen lapang, asa dipatuduhon tu hita hatuaonNa i.
L: Dipahot Debata ma las ni rohanta manghalashon Pesta Jubileum 150 taon HKBP na tapatupa sadari on, songon tanda ni parsitutuonta i patulushon Pembangunan Gareja HKBP Sukajadi on, tau pangalapan pasupasu di saluhut na bongot dohot na haruar sian joroNa nabadia i. Nuaeng pe, tapahohom ma rohanta paihut-ihut Ibadah on marhite na rap hita mengendehon: “Sai marlas ni roha hita ale dongan Kristen i.........”!
S: Mangendehon No. 90:1-2 “Sai marlas ni roha hita”
1. Sai marlas ni roha hita ale hajolmaon i. Ai naung hehe do Tuhanta sian hamatean i. Dipasidung Jesus i ulaonNa sasude, patupahon haluaon di saluhut hajolmaon.
~~~ Jongjong ma hita saluhutna~~~
2. Anggo utang ni dosangku digarari Jesus i. I do haporseaonku di na tinaonNa i. Nunga tulus Patik i nunga mintop rimas i. Di na hehe i Ibana ro di au hangoluanNa.
03. Votum – Introitus – Tangiang: (L=Liturgis; H=Huria; S=Sude)
L: Tapungka ma parsaoranta na badia di Pestanta sadari on dibagasan Goar ni Debata Ama, AnakNa Tuhan Jesus Kristus dohot Tondi Parbadia, na manompa langit dohot tano on. Amen. Jahowa do pargogonta dohot endenta, jadi gabe hatuaonta ibana. Soara ni olopolop dohot hatuaon marsaringar di undungundung ni angka partigor: Siamun ni Jahowa do Sibahen hamonangan di hita.
A: Timbul situtu do siamun ni Jahowa, siamun ni Jahowa do Sibahen hamonangan. Ibana do patauhon hita pajojorhon angka pambahen ni Jahowa di ngolunta. Nunga gogo tutu dipinsang Jahowa hita, alai nda tung tu hamatean hita dipasahat, alai di togu do ngolunta tu hangoluan saleleng-lelengna.
I: Taungkap ma di Ibana bahal ni hatigoran, tabongoti ma joroNa mamuji Jahowa.
L: On do bahal ni Jahowa, sibongotan ni angka partigor. Tapatuduhon ma olopolop ni tondinta mamuji Ibana ganup ari. Antong! Tapangido-hon ma tu Tuhanta Pardenggan basa i:
S: Mangendehon No. 36: 1 + 3 “Pasupasu hami”
1. Pasupasu hami O Debatanami. Sai sondangkon bohiMi tu napungu on sude.
3. Amen hudok hami, ale Tuhannami. Na marasi roha i sangap ma di goarMi.
L: Mandok mauliate ma hami tu Ho ale Jahowa, ala naung dialusi Ho hami, jala manjadi hatuaonnami. Batu naung binolongkon ni angka pande bagas, i ma jadi batu parsuhi. Sian Jahowa do i masa, halongangan do i anggo di matanta.
H: Ari on do na jinadihon ni Jahowa, marolopolop jala marlas ni roha ma hita disi. Iale Jahowa, sai manumpak ma Ho! Iale Jahowa sai Ho ma mambahen manjadi.
L: Pinasupasu ma na ro marhitehite goar ni Jahowa, hupasupasu hami ma hamu, angka na sian bagas ni Jahowa. Jahowa do Debata, jala Ibana manondangi hita. Tambathon hamu ma angka pelean pesta i sahat ro di angka tanduk ni langgatan. Ibana do Debatanta, jadi Ibana do sipujion jala sipatimbulonta.
H: Mandok mauliate ma hita di Jahowa, ai Pardengganbasa do Ibana, ai ro di salelenglelengna do asi ni rohaNa i.
L: Taparangehon ma na tama di Tuhan i, marguru tu sandok lomo ni rohaNa, marparbuehon parbue marhitehite saluhut ulaon na denggan. Taoloi ma Jahowa marhitehite las ni roha, ro be ma hita tu adopanNa marhite olopolop. Taendehon ma: Puji Tuhan Haleluya.
S: Mangendehon: Puji Tuhan halleluya 3X – Haleluya - Haleluya
L: Martangiang ma hita: Ale Tuhan Debata, Pargogo na so hatudosan! Sai lehon jala patubu ma di hami haporseaon na sintong, asa lam togu mangihuthon dohot mangoloi hataM. Nunga marpungu hami dison ruas ni HuriaM dohot angka naposoM, manghamauliate-hon pangaramotionMu dohot pasu-pasuM naung huparsaulihon hami manghalashon Jubileum 150 taon HuriaM HKBP na hupatupa hami di huriaM HKBP Sukajadi on. Ro ma Ho mangingani hami, asa tondiMi manggohi rohanami patupa lomo ni rohaM. Sai buhai ma pinggol dohot rohanami, asa marlas ni roha hami manangihon hataM jala ringgas mangulahon lomo ni rohaM. Patau jala urupi ma hami, asa huparhaseang hami ari-ari ni ngolunami mangulahon lomo ni rohaM. Nunga dipataru Ho hami tu joroMon, patau ma hami manumpahi Pesta Jubileum 150 taon HuriaM HKBP, baen hagaganda ni bilangan ni angka na porsea di Ho. Sai tangihon ma somba dohot puji-pujiannami on marhite Tuhannami Jesus Kristus AnakMi. Amen.
~~~Hundul ma hita saluhutna~~~
04. Marende No. 202: 1 + 5 “ Huhaholongi Ho gogongku”
1. Huhaholongi Ho gogongku, huhaholongi Ho tongtong. Marhitehite pambaenanku, nang sian nasa rohangkon. Ai Ho do sumondangi au, ro di na mate au.
5. Mauliate ma rohangku di Ho na manondangi au. Hupuji Ho ale Tuhanku dibaen na tinangkupMu au. Hisar do tondingki dibaen hutanda Ho nuaeng.
05. Patik: 1 Petrus 1: 13
L: Tatangihon jala tajaha ma Hata ni Debata na paingothon hita huriaNa laho mangaradoti patikNa, i ma na tarsurat di 1 Petrus 1: 13, na mandok: “Dibahen i, hohosi hamu ma rohamuna. Torang ma rohamuna”.
H: Sandok manghirim ma hamu di asi ni roha na tarboan tu hamu di hapataron ni Jesus Kristus.
L: I ma sahatna. Antong! Rap mangido gogo ma hita sian Tuhanta laho mangulahon PatikNa i.
S: Ale Tuhan Debata, sai pargogo i ma hami mangulahon na hombar tu PatikMi. Amen.
06. Marende No. 136:1 + 3 “Bidang dope na holom i”
1. Bidang dope na holom i, dibangso na dihasiangan i :;: Na nirajaan ni sibolis i, disomba halak angka begu i :;:.
3. Torang do bagabaga ni Amanta di banua ginjang i. :;: ArahononNa jolma sasude. Tu hasonangan ni rohana be :;:.
07. MARNINGOT SEKILAS SEJARAH PARJONGJONG NI HKBP:
(Hatorangan: Bangso Batak na dibagasan haholomon marpahean hasipelebeguon disondangi Barita Nauli).
S1: Hamuna angka dongan sahaporseaon! Mamungka taon 1824, nunga disuru Gareja Baptis na di Inggris Pdt. Burton dohot Pdt. Ward tu tano Batak, alai ditulak angka ompunta na parjoloi do nasida. Marudut ma di taon 1934, disuru Badan Zending na di Amerika do Pdt. Henry Lyman dohot Pdt. Samuel Munson tu tano Batak, alai i ma huroha pangalahona, dibunu nasida do Pandita na dua i.
S2: Ndang dipaloas Debata Bangso Batak tinggal di haholomon, mangula do Debata marhite Badan Zending RMG (Reinische Mission Gesselchalft) di Jerman na di tulak di Kalimantan, ala tongon di hatiha i masa do porang na ginoaran Perang Hidayat na mangalo penjajah Klonial Bolanda na laos marpanghorhon sogo ni roha ni Bangsonta marnida halak Eropah. Adong do tolu halak Pandita na mate tarbunu di tingki i, na deba pola ingkon gabe mengungsi, termasuk dohot Pdt. Klammer.
S1: Marpanghorhon situtu do Porang na di Kalimantan i tu panghobasion ni Badan Zending RMG. Dung sahat barita i tu Pdt. Friederik Fabri na manguluhon Badan Zending RMG di Jerman, borhat ma ibana tu Bolanda, pajumpang dohot Van Der Tuuk, sahalak ahli di Negara Bolanda naung godang manurathon taringot tu Ha-Batak-on. Dilehon Van Der Tuuk ma parbue ni pikiranna tu Pdt, Friederik Fabri, asa mamingkirhon penginjilan tu tano Batak khususna na di Sipirok, Tapanuli Selatan nuaeng.
S2: Marningot kondisi Kalimantan na so memungkinkan be inganan laho manorushon pelayanan penginjilan di luat i, dibuhai Debata ma roha ni Pdt. Friederik Fabri asa mangula tu tano Batak. Disuru RMG ma muse dua halak Parbarita Nauli tu tano Batak, i ma: Johan Carl Klammer dohot Wilhem Carl Heine. Nunga jumolo hian Parbarita Nauli na sian Negara Bolanda marbarita Nauli di tano Batak, i ma: Pdt. Van Assel dohot Pdt. Betz. Pajumpang ma nasida di Parau Sorat Sipirok di ari 7 Oktober 1861.
S1: Diparjumpangan nasida i di pergumulhon nasida ma Hata ni Debata na tarsurat di Buku Panurirang Mika 4: 1, na mandok: “Jadi masa ma sogot di ujung ni angka ari: Ojak ma dolok ni Joro ni Jahowa di punsu ni angka dolok, jala huminsat sian angka dolok, jala huminsat sian angka robean, jadi marrongoman ma tu Ibana angka bangso”.
(Manghuling ma orgel angon-angon sian BE No. 424).
S: Mangendehon: No. 424: 2 ”Soara ni Tondi”
. Tangihon hataNa, parguru ma i. Rajumi ruasMu ginomgomNa i. Pangido: Sai lehon tu au tondiMi. Pargogo, mangula sandok lomoMi.
S3: Na margogo situtu do tangiang ni partigor molo di haburjuhon, jala Hata ni Debata do dalan manuju tu hangoluan na salelenglelengna. Sian hasil ni rapot na pinatupa ni Pdt. Heine, Klammer, Bet dohot Pan Assel, mardos ni roha ma nasida marsagi ulaon marbarita nauli tu tano Batak di sabola utara. Dipados ma tahina laho patupa tolu filar panghobasion laos huhut patupa pargodungan (christendom), i ma: Pembangunan Gareja; Parsingkolaan dohot Rumah Sakit.
S1: Sada Sejarah na so tarhalupahon Bangso Batak do parrapoton ni na opat halak Pandita na di Parau Sorat Sipirok i. Ai marhite i ma rarat Harajaon ni Debata di Tano Batak. Pdt. Klammer, pajongjong huria di Sipirok dohot Pdt. Betz di Bunga Bondar. Marudut ma di taon 1862, Pdt. Van Assel pajongjong Huria di Pangaloan – Sarulla; dohot Pdt. Heine di Sigompulon Pahae. Asa, sian goar ni na opat halak Pandita i ma jongjong goar ni HKBP, i ma: HEINE, KLAMMER, BETZ dohot VAN ASSEL na dipahot di Konfrensi Pekabar Injil taon 1905. Marningot parrapoton ni na opat halak Pandita i di ari 7 Oktober 1861, laos di ari 7 Oktober i ma dirajumi ari parjongjong ni HKBP: HURIA KRISTEN BATAK PROTESTAN. Laos di ari 7 Oktober i ma diputushon HKBP merayakan JUBILEUM na.
S2: Ndang tarasam hita tahe denggan basa ni Jahowa na manghophop jala na paluahon Bangso Batak sian huaso ni haholomon i, ai di ari 31 Maret 1861, nunga adong sian Bangso Batak naung tardidi, i ma: Simon Siregar sahalak anak ni raja, dohot Jakobus Pohan Tampubolon na pinatupa ni Pdt. Van Assel di Barus. Nasida ma na parjolo sahali manghatindanghon goar ni Tuhan Jesus di tano Batak. Alai ndang Pandidion naparjolo i diramuji angka Parbarita Nauli na parjoloi ari hatutubu ni HKBP, alai tung sian dos ni roha ni Badan Zending RMG i do.
S: Mangendehon No. 182:1 - 2 “Tu JoloM, O Debatangku”
1. Tu joloM, O Debatangku! Sai use do rohangkon. Sai pasiat tangiangku dohot iluilungkon.
2. Husolsoli do rohangku na gok dosa i tongtong. Ai godang ariaringku na hubahen ambolong.
S3: Mansai balga do holong ni roha ni Tuhanta Jesus Kristus tu hita huriaNa HKBP, lumobi ma tu Bangso Batak. Sahat tu tingki on (taon 2011), adong ma ruas ni HKBP 4, 1 Juta jiwa, jumlah na mansai balga do i na di hobasi di 26 Distrik, 614 Ressort, 3.226 Huria. Asing ni, adong dope 41 Pos Pelayanan, 25 Pos pelayanan Zending. Saluhutna on dihobasi Hurianta marhite angka pelayan na gok tingki godangna 2.590 halak. Terdiri sian: 1.470 Pandita; 428 Guru Huria; 408 Bybelvrouw dohot 284 Diakones. Diperhitungkan tamba dope torop ni pangula na gok tingki di taon 2011 on.
S1:Hamuna angka dongan na hinaholongan! Songon on do didok Hata ni Debata: “Onpe, songon panjangkonmuna di Kristus Jesus, Tuhan i, songon i ma hamu marparange dibagasan Ibana! Gabe marurat jala pinauliuli ma hamu dibagasan Ibana, togu marhaporseaon, hombar tu na niajarhon tu hamuna; lumobi ma hamu marroha mauliate” (Kol 2: 6 – 7).
S2:Mauliate ma rohanta tu Tuhanta Pardenggan basa i napaluahon Bangso Batak sian haotoon tu hapistaran nang habisuhon pe, sian hamalason tu haringgason, sian hapogoson tu hamoraon, sian ketertinggalan tu hamajuon. Alai na umbalga sian i dope, tung tahamauliatehon do tu Debata Parasiroha i, napaluahon Bangso Batak sian hasipelebeguon gabe tartogu manghaporseai Debata Sitolu sada i.
SUDE:
Ditompa Debata ma roha na ias dibagasan hita, jala dipaimbaru ma tondi na marsihohot dibagasan hita, asa tung tarulahon hita lomo ni rohaNa. Godang ma tongon na binahen ni Jahowa tu hita, jadi marhilas jala marolopolop ma hita disi.
08. Marende No. 167:1 + 7 “O Debata mansai balga”
1. O Debata mansai balga, huhut dokdok dosangku. Na soadong di tano on na tau haporusanku. ~~~~~~ Jongjong~~~~~~
7. Tu asiMi ma rohangki, sai sesa ma dosangku. Tu lambungMi ma tondingki, dung tos muse hosangku.
09. Manopoti dosa – Bagabaga ni Debata:
L: Hamuna angka dongan sahaporseaon! Nuaeng pe, nunga jongjong do hita di adopan ni Debata na mamereng torus tu bagasan rohanta. Tapaunduk ma rohanta martangiang tu Debata Parasi roha i mangido hasesaan ni dosanta.
H: Ale Tuhan Debata, Ama ni Tuhan Jesus Kristus Sipalua hami sian haholomon tu hatiuron, sian hasipelebeguon tu ngolu haporseaon tu Ho Debata Sitolu sada. Asi ma rohaM, sai sesa ma dosanami na godang i.
SL: Mangendehon: No. 424: 3 ”Soara ni Tondi”
Marunduk ni roha topoti sude. Pambaenmu na torbang jengkelmu sude. Pasahat tu Jesus sandok dirimi. Sai tong pasunggulhon panghophopNa i.
L: Ale Tuhan Debata! Pargogo na so hatudosan jala Amanami! Hujou hami do goarMu na badia i, ala na targogot situtu hami di dosanami i. Sai marasi ni roha ma Ho mida hami jolma pardosa on. Asi ma rohaM di hami, sai patongtong ma di hami roha hamauliateon tu Ho; asa lam hutanda hami dalan tu banua ginjang i.
H: Ale Tuhan Debata! Asi ma rohaM di hami! Nang pe naung 150 taon huriaM HKBP, alai jotjot do hami tarsolsol bagi ala ni pambahenan-nami na hurang tama di adopanMu dohot di jolo ni angka dongannami jolma. Jotjot do hulaosi hami angka PatikMu dohot HataM nabadia i. Ndang hupasangap hami Ho di ngolunami be, songon i nang di bagas JoroMi, ala ni hagiot ni pardagingonnami nang parsaoran hajolmaonnami pe. Mauliate ma rohanami tu Ho, ala naung disuanhon Ho hataMi tu hami huriaM HKBP.
L: Molo ro hami nuaeng tu adopanMu nabadia i, pargogoi ma hami manggotaphon sian ngolunami roha late dohot nasa hosom ni roha. Angkup ni i, dasdasi ma hami mardenggan dohot halak na mangar-sahi hami, jala patau ma hami asa tongtong rade manesa dosa ni dongan na mardosa tu hami. O Tondi Parbadia! Pangapul di na marsak roha, pamalum ma saluhut na bernit, binahen ni dosanami! Ro ma Ho mangingani hami, asa marlas ni roha hami mangulahon lomo ni rohaM. Ho do parhitean ni nasa asi ni roha, sai unang tulak hami.
H: O Tuhan Debata! Asi ma rohaM di hami, sai sesa ma luhut dosanami. Sai tangihon ma tangiangnami, Ho ale Debata Ama, Anak dohot Tondi Parbadia.
L: Hamuna angka dongan na ninaholongan ni Tuhan Jesus! Pos ma rohanta, nunga disesa Debata sude dosanta. Ala ni patut ma hita marhaunduhon tu Ibana sian nasa serep ni rohanta. Taendehon ma ende on songon tanda ni haporseaonta tu Debata Parasi roha i: “Mauliate ma rohangku dibaen na pinarbagaMi…..”
S: Mangendehon No 210: 4 ”O Tuhan na marasi roha”
Mauliate ma rohangku dibaen na pinarbagaMi; Ndang olo asi ni rohaMu mansohot salelengna i. Sai hot do padan binaenMi, nang pe lao sego sasude.
L: Hamuna angka dongan na hinaholongan! Tajangkon jala tahangoluhon ma bagabaga ni Debata taringot tu hasesaan ni dosanta: “Songon on do Hata ni Tuhan Jahowa: Nunga di arsahi ho Ahu marhite sian angka dosam, jala nunga dilojai ho Ahu marhite sian angka hajahatonmu. Ahu tutu, Ahu sandiri manalesei angka pangalaosim ala ni hadirionKu, jala ndang be Hupaingotingot angka dosam”. Hasangapon ma di Debata na di ginjang.
S: Amen. ~~~~~~Hundul ma hita~~~~~~~~
10. Marende No. 772: 1 + 3 “Tuhanku do pature dalanki”
1. Tuhanku do pature dalanki, Tuhanku do patiur langkangki, sian nasa rohangki, hupasahat ngolungki, Tuhanku do patiur langkangki.
3. Tuhanku do pature dalanki, Tuhanku do patiur langkangki, hupasahat diringki tu tangan ni Tuhanki, Tuhanku do patiur langkangki.
11. Epistel: 1 Samuel 2: 1 – 8
L: Tajaha jala tahangoluhon ma Hata ni Debata, turpuk Epistel di Minggunta sadari on, i ma na tarsurat di 1 Samuel 2: 1 – 8, Na mandok: Dung i martangiang ma si Hanna, ninna ma: Marolopolop ma rohangku mida Jahowa, timbul do tandukku di bagasan Jahowa, na hirtap situtu do pamanganku dompak angka musungku, umbahen na las rohangku di pangurupionmi.
A: Ndang adong na badia, tudoshon Jahowa, ai ndang adong dungkon ni Ho, jala ndang adong partanobatoan, dungkon ni Debatangku.
I: Unang sai datdati hamu manenganengahon haginjangon, unang ruar hata jungkat sian pamanganmuna, ai Jahowa do, Debata nampuna angka parbinotoan, jala Ibana dumasing angka pambahenan.
L: Marponggolan do sior ni ulubalang, jala marhohos hatogaron do angka naung mandate.
R/M: Angka na lobian na sai laon laho do mansari sipanganon, jala angka na rapar hian marlanggelangge; pola tubuan anak pitu na hol hian, jala merus boti sitorop anak hian.
L: Jahowa do na mambunu dohot na pangoluhon; Ibana patuathon tu banua toru dohot panangkokkon muse.
A: Jahowa do na mambahen pogos dohot mambahen mamora; Ibana do paijurhon, laos Ibana patimbulhon muse.
S: Ibana pahehehon sian orbuk halak na tarjepol hian, jala dipatimbul na pogos i sian gambo laho pahundulhon tu lambung ni angka na sangap, jala diturpukkon habangsa hamuliaon tu nasida, ai Jahowa do nampuna angka ojahan ni tano on, jala dipaojak di atasna hasiangan on.
L: I ma sahatna. Martua ma na manjaha dohot na tumangihon Hata ni Debata, lumobi ma na mangulahonsa sian na sa rohana dibagasan Tuhan i.
S: Amen.
12. Marende No. 811: 1 + 3 “Di au ma Ho Tuhan”
1. Di au ma Ho Tuhan di ariaringki, ai denggan ni basaM padame rohangki.
Ref. Disude partingkian, di sude inganan di au ma Ho O Tuhan asi rohaM. ~~~~~Jongjong~~~~
3. Di au ma Ho Tuhan di las ni roha i, apuli au Tuhan disitaononki. Disude partingkian…..!
13. Manghatindangkon Haporseaon:
L: Tahatindanghon ma haporseaonta i rap dohot donganta sahaporsea-on di sandok portibi on, Rap ma hita mandok:
S: Ahu porsea.......! ~~~~~Hundul~~~~~~
14. Koor:
15. Tingting Na Masa:
16. Marende No. 789: 1-..... “Lului hamu Harajaon ni Debata”
(Laos pasahathon Pelean Ia & Ib)
1. Lului hamu Harajaon ni Debata, rap dohot hatigoranNa. Tamba-hononNa ma ondeng tu hamu. Haleluya, haleluya.
Ref. Haleluya, haleluya, Haleluya, haleluya, haleluya.
2. Pangido ma sai na lehononNa do, lului ma sai na jumpang. Tuktuhi ma sai na ungkaponNa do. Haleluya, heleluya.
~~~~ Musik/Gondang~~~~~
3. Ndada holan sipanganon na ringkot, baen hangoluan ni jolma. Tung nasa Hata ni Debatanta do. Haleluya, haleluya.
4. Dua manang tolu halak pe hamu. Pungu marhite goarNa. Tuhanta Jesus ditongatongamu. Haleluya, haleluya.
17. Jamita: Johannes 20: 1 - 10
18 Marende No. 848: 1-...”Dison adong huboan Tuhan”
(Laos pasahathon Pelean II dohot Silua)
L: Hamuna angka dongan sahaporseaon! Nuaeng sahat ma hita tu na pasahathon pelean dohot siluanta nanionjar ni haporseaonta manumpahi Pesta Jubileum 150 taon HKBP, dohot patuduhon parbue ni haporseaonta patulushon Pembangunan Gareja HKBP Maranatha on. Aha do bonana, jala dia do tampukna, molo tapaumbuk tu ngolu haporseaonta? Didok angka situatua ni halak Batak: Pantun do hangoluan, tois hamagoan. Mata ni ari binsar di luat Panggabean, jangkonon parsaulian, sipir ni tondi parhorasan.
H: Mual ni Tanggabatu partumpuan ni na mora; Ojak di pinggan pasu, hot di tonga ni ruma. Bohal di partumpuan, buhul ni parsaoran, udut ni hangoluan, mungka ni parhorasan.
~~~~~~~Musik/Gondang: Mangalusi~~~~~~
L: Asa, mardangka ma baringin di mual ni Pulo batu, sai pir ma tondi madingin, horas ma tondi matogu. Ganjang ma songon pining, tangkas ma songon poda, sindak ma panaili, sai mulak hosa loja. Neang ma holi-holi, girgir ma dohot roha. Ojak songon tatuan, rintar songon sahala, hobol situlak mara, tawar sitampar gora.
H: Asa, bintang na rumiris, ombun na sumorop, anak pe riris, boru pe torop. Ai mamiar ma panduda di losung ni Bakara, asa sinur ma na pinahan, gabe ma na niula. Silanlan urukuruk, tu silanlan aek toba. Nametmet ndang marungutungut, saluhut na magodang marolopolop jala marlas ni roha.
~~~~~~~Musik/Gondang: Mangalusi~~~~~~
L: Eme sitamba tua, pinauli di pinggan pasu; Sai Tuhanta Debata na martua, i ma Silehon tua dohot pasupasu. Sai horas hita maruli tua, jala sude ma hita dapotan pasupasu.
~~~~~~~Musik/Gondang: Mangalusi~~~~~~
L: Hamuna angka dongan! Didok Hata ni Debata: “Na manaburhon otik, otik do gotilonna; jala na manaburhon managam pasupasu, mangalap pasupasu di na manggotil. Ganup ma ni onjar ni rohana, unang ma sian muruk manang sian na so tarjua; ai dihaholongi Debata do na las roha mangalehon”.
H: Alai marhuaso do Debata, mangusehon saluhut asi-asi tu hita, asa sandok tuk situtu di hita jala marlobilobi hita, laho patupahon saluhut ulaon na denggan tau pujipujian di Debata.
L: Antong! Sian nasa roha dohot haporseaonta, tapasahat ma pelean hamauliateon ni rohanta. Huhut ma taendehon: ”Dison adong huboan Tuhan.....”
S: Mangendehon No. 848: 1.... “Dison adong huboan”
1. Dison adong huboan Tuhan, parbue ni ngolungku na so tardok nian, Sadia ma argana Tuhan molo sai nirajuman sude denggan basaM. Jalo ma Tuhan sai las ma rohaM.
2. Dison adong huboan Tuhan, tondingku na girgir mangoloi di HataM. Pasaorhon ma HataM da Tuhan manogu tondingki mangihuthon lomoM. Jalo ma Tuhan sai las ma rohaM.
~~~~ Musik/Gondang~~~~~
3. Dison adong huboan Tuhan pamatang na hipas baen pelean di joloM. Sai pangke ma au on da Tuhan, na tau ulaulaM na hasea di joloM. Jalo ma Tuhan, sai las ma rohaM.
4. Dison adong huboan Tuhan, hosa nang gogongki tau pelean di joloM. Patau pasingkop ma au Tuhan asa marguna au manghobasi huriaM. Jalo ma Tuhan, sai las ma rohaM.
~~~~ Musik/Gondang~~~~~
5. Dison adong huboan Tuhan arta sinamothon so sadia i nian. Parbadia ma i tung singkop asa ture sintong lao pauli HuriaM. Jalo ma Tuhan, sai las ma rohaM.
6. Huingot do HataM da Tuhan, saor do pasupasu di halak na bojok. Asal ma disombahon Tuhan ngoluna i singkop baen pelean di joloM. Jalo ma Tuhan sai las ma rohaM.
~~~~ Musik/Gondang~~~~~
19. Tangiang Pelean – Ale Amanami –
Pasu-pasu! Amen 3 X diendehon.
Tidak ada komentar:
Posting Komentar