Sabtu, 30 April 2011

Acara Partangiangan Bona Taon Hutabarat 2011


Acara Partangiangan Bona Taon
Punguan  Siraja Nabarat, Boru, Bere dohot Ibebere
Se - Pekanbaru sekitarna
Di Gedung Serbaguna HKBP Pekanbaru
Jln. Hang Tuah No. 36
Ari Jumat, Tgl. 11 Maret 2011.
Tapatuduhon ma hinadengganni na marhahamaranggi, na sahundulan dibagasan Tuhan i (Psalm 133: 1 – 3)
Marhite Partangiangan Bona Taon Siraja Nabarat, Boru, Bere, Ibebere Sa Pekanbaru on, lam marsitoguan ma hita tu hamajuon i.
I. KEBAKTIAN
01. Joujou tu Parsaoran Nabadia:
L:   Hamuna angka dongan sahaporseaon! Sadari on ari Jumat, Tgl. 11 Maret 2011 on, Marpungu do hita Siraja Nabarat, Boru, bere dohot Ibebere sa Pekanbaru sekitarna on, mandok mauliate tu Tuhanta Pardenggan basa i na paloas-hon hita mandok mauliate tu Ibana. Ganup sahat hita tu Bona ni Taon, sai tendehon do: Taon Parasi ni rohaon baen di au sandok taon on. Lam pahot ma hasesaan ni dosangku di au on. Holan Ho do Jesuski, tuk pasaehon dosangki. Antong! Dia ma dohononta di adopan ni Debata Pardenggan basa i di tingki on?
 S: Mangendehon BE No. 36: 1”Pasupasu hami”
     Pasupasu hami, O Debatanami. Sai sondangkon bohiMi tu napungu on sude. 
L:   Pardenggan basa do Jahowa, Ibana do Siapuli roha ni angka na marsak jala na loja ala ni holong ni rohaNa di hita jolma pardosa. Dijalo Ibana ma tangiangta ala denggan ni basaNa. Jala saluhut jea dipadao sian hita asa tung sonang rohanta mandalani ari-ari ni ngolunta dibagasan taon 2011 on. Nuaeng pe, taendehon ma tangiang dohot elekelekta tu Tuhanta Pardengganbasa i:
 S: Mangendehon BE No. 36: 2 - 3”Pasupasu hami”
    2. Lehon ma di hami, dame ganup ari, Sai pasaor ma tondiMi tu na pungu on sude.  
    3. Amen hudok hami, ale Tuhannami. Na marasi roha i, sangap ma di goarMi.
L:   I do tutu. Alai molo tapamanat haporseaon dohot par-rohaonta siganup ari, jotjot do hita lupa di denggan ni basaNa paloashon hita taripar tu bona ni taon on. Nuaeng pe, asa tung haru singkop las ni rohanta manghamaulia-tehon denggan ni basaNa, dia ma dohononta di adopan ni Debata Pardenggan basa i?
PUNGUAN:
Ale Jahowa, Debatanami Ho do siapulirohanami, pahot ma haporseaonnami ala denggan ni basaM, jalo ma tangiang-nami na tadek di adopanMu na badia i.Sai pagomos ma rohanami manundalhon saluhutna dosa, jala sai lam paganda ma ringgas ni rohanami mangulahon nanidok ni hataM. Patau ma rohanami mamingkiri denggan ni basaM asa unang lalap rohanami di portibi on. Sai ramoti roha, pingkiran dohot saluhut ngolunami mandalani taon na-binasa-basahonMi tu hami. Asa tung las rohanami mang-haporseai Ho.  
  L: Nunga tapangidohon tu Debata Pardenggan basa i, Ibana ma tutu na mangalehon ragam ni pasupasuNa tu hita di na mandalani taon 2011 on hita. Asa tung las rohanta mandalani ari-ari ni ngolunta di taon 2011 on, tung gomos ma tapangidohon sian nasa bulus dohot ias ni rohanta, rap ma hita mandok:
PUNGUAN:
L:   Nunga tapangidohon tu Debata asa dipahot las ni roha, panghirimon dohot haporseaonta mandalani taon 2011 on, nuaeng pe, taelekhon jala tasombahon ma ende puji-pujianta tu Ibana, rap ma hita mangendehon: “Las rohang-ku lao mamuji Debata Parholong i......”
02. Marende No. 565: 1 + 4 “Las rohangku lao mamuji”
1. Las rohangku lao mamuji Debata Parholong i, songon bunga na mangerbang di nabinsar ari i. Arsak dosa haporsuhon mago di baen asiMi. Las ni roha na manongtong lehon di au Tuhanki.   Jongjong ma hita saluhutna
4.  Rap ma hita mangendehon sangap di GoarNa i, tapangiar soaranta lao mamuji Tuhan i. Sun do holong ni rohaNa na so marnamontok i. I do pasadahon hita salelenglelengna i.
03. Votum – Introitus – Tangiang: (L= Liturgis; P= Punguan; S = Sude)
L:   Marhitehite Goar ni Debata Ama, AnakNa Tuhan Jesus Kristus dohot Tondi Parbadia, na manompa langit dohot tano on. Amen. Mandok mauliate ma hamu di Jahowa, ai na basa do Ibana, ai ro di salelenglelengna do Asi ni rohaNa i.
P:   Sai urupi ma hami ale Jahowa Debatanami Sai tumpahi ma ngolunami hombar tu asi ni rohaM.
L:   Jala halomohon Jahowa jadi lehononNa ma tu ho pinangido ni rohaM. Pasahat ma dalanmu tu Jahowa jala haposi Ibana asa Ibana paturehon.
P:   Taoloi ma Jahowa marhitehite las ni roha, ro be ma hita tu joloNa marhitehite olopolop.
L:   Taboto ma: Jahowa do Debata; Ibana do na jumadihon hita, jala Ibana nampuna hita, bahen bangsoNa dohot birubiruNa.
P:   Martua ma ganup na manghabiari Jahowa, na marparange di angka dalanNa i. Sai panganonta do na niula ni tanganta, martua ma hita jala sonang.
S:   Tapuji ma Jahowa, ai Pardenggan basa do Ibana; taendehon ma goarNa, ai hasudungan ni rohanta do Ibana.
L:   Martangiang ma hita: Ale Tuhan Debata, huboto hami, ndada ala ni gogo dohot habisuhonnami sambing umbahen na tarbahen hami tolhas tu taon 2011 on; tung holan ala asi ni rohaM sambing do. Hupasahat hami ma ngolunami tu Ho mandalani ariari na pinasahatMu tu hami di taon 2011 on. Manang dibagasan las ni roha manang arsak ni roha hami, holan Ho sambing ma huhaposi hami. Ala ni, tambai ma nang haporseaonnami, asa tongtong hami marsigantung tu Ho. Unang mandele hami molo ro pangunjunan tu hami. Hupagomgomhon hami ma nang punguannami on tu adopanMu nabadia i, asa anggiat punguannami on lam tu sadana tau mamparbuehon godang angka na denggan tu saluhut ruasna nang na humaliang hami pe. Hupasahat hami ma tangiangnami on tu Ho, marhite Tuhan Jesus Kristus na pasadahon hami mandok mauliate tu Ho. Amen. (Hundul ma hita saluhutna)
04 Marende No. 707: 1 + 3 “Hagogoon dohot apulapul”  
1.  Hagogoon dohot apul-apul do dilehon Tuhan i tu au. Ganup ari au ditogutogu, ganup tingki di ondingi au. Ai hombar tu lomo ni rohaNa, do dilehon Tuhan i tu au. Ro marsorin arsak las ni roha, haporseaonku di patau.
      3.  Songon Ama do tu anakhonna, holong ni Tuhanta i tu au. Ndang mansadi pangurupionNa, hombar tu padanNa na tu au. Debata Amanta na di ginjang, i do haposanku sai tongtong. Dipang-iringiring ni tanganNa dame sonang do rohangkinon.
05 GABE PARROHA MAULIATE MA HITA TU DEBATA:
L:   Mandok mauliate ma hita tu Debata na mangolui, ala denggan ni basaNa dohot asi ni rohaNa na so halompoan i mangaramoti ngolunta. Mansai balga situtu do holong ni roha ni Tuhanta mangaramoti hita Punguan Siraja Nabarat, boru, bere, Ibebere na adong di  Pekanbaru sekitarna on, sian taon naung salpu sahat tu taon 2011 on.
HULA-HULA:
Dilehon do las ni roha dohot panghirimon na mangolu tu hita, nang pe marombas-ombas arsak nang las ni roha taadopi di taon naung salpu i. Ndang tarasam hita denggan basa ni Jahowa mangaramoti ngolunta. Alani, patut tapuji Ibana jala taoloi na nidokNa.
L:   Idama, pangarimpunan ni na denggan naung huida i: Lehet do mangan minum jolma i jala dipasonang rohana mang-ihut-ihut sandok ulaonna hian na niulana di hasiangan on saleleng di ngoluna. Na nilehon ni Debata tu ibana; ai i do jambarna.
BORU:
Angkup ni i, molo dilehon Debata tu manang ise hamoraon dohot sinamot, diloas ibana mangan dohot mam-buat jambarna sian i, huhut marlas ni roha diulaonna, silehon-lehon ni Debata do i. Ai ndang sadia dipaingot-ingot rohana angka ari ni ngoluna, ala naung nialusan ni Debata ibana marhite sian las ni rohana.
L:   Jahowa do silehon tua dohot pasupasu tu hita, Ibana do hatuaonta. Soara ni olopolop dohot hatuaon marsaringar di undung-undung ni angka partigor: Siamun ni Jahowa do sibahen hamonangan dohot las ni roha di hita. Hamu ale angka na manghabiari Jahowa, marhaposan tu Ibana ma hita! Ibana ma tutu Pangurupi dohot lombu-lombunta dipardalanan ni ngolunta ganup ari.
HULA-HULA:
Dingot Jahowa do hita: Ibana ma tutu mamasumasu ngolunta. Ibana do mamasumasu nang pinompar ni sude Punguan Siraja Nabarat, boru, bere, Ibebere na di ranto nang di Bona Pasogit pe; martua ma hita jala sonang.
L:   Ibana mamasumasu angka na manghabiari Jahowa, angka na metmet dohot angka na magodang. Sai amba-ambaan ni Jahowa do pasupasuNa tu hita dohot tu pinomparta sogot.
BERE, IBEBERE:        
Martua ma ganup na manghabiari Jahowa, na lomo roha situtu di angka patikNa! Sangap ma pinomparna i sogot di tano on, dapotan pasupasu ma sundut ni angka partigor sogot.
SUDE:    
Hamoraon marlobilobi dibagasan jabuna, jala hot do hatigoranna i ro di salelenglelengna. Idama, sai songon i do tongon dapotan pasupasu ganup jolma na manghabiari Jahowa. Amen.
06. Ende Parsadaan ni Siraja Nabarat: “Sai hehe ma hamuna”.
07.  Marende No 697:1  “Molo Ho do huihuthon”
Molo Ho do huihuthon, dame sonang rohangki, sai horas jala martua nasa na hinophopMi. Ho tongtong ihuthononku, Jesus na palua au. Ho sambing do oloanku ala ni martua au.
08. Jamita:
09. Marende No 697: 2 “Molo Ho do huihuthon”
  Hupelehon ma diringku mangihuthon lomoMi, ndada be na olo    salpu na manggohi rohangki. Ho tongtong ihuthononku....!
10. Doa Syafaat (Tangiang) sian sahalak natua-tua ni punguan:
11. Marende No. 435: 1 -.... “Marolopolop tondingki”
(Laos Pasahathon pelean tu HKBP Pekanbaru Kota)
1.  Marolopolop tondingki, ai naung ditobus Jesus i. Hamu sude bege ma i sai las rohangku mandok i.
     Reff. Sonang ni tingki i dung jumpang Jesus Tuhanki. TondiNa mangajari au, tarbaen marlas ni roha au. Sonang ni tingki i, dung jumpang Jesus Tuhanki.
      2.  Dihaol holongNa rohangki tung na so boi be mago i. MataNa do manatap au pinggolNa tumangihon au. Sonang ni.....!
      3.  Tu Jesus sahat ngolungki saleleng ni lelengna i. Rap dohot au endehon ma endengku na imbaru da. Sonang ni.......!
12.Pujipujian marningot denggan basa ni Jahowa:
L:  Hamuna angka dongan na hinaholongan ni Kristus! Sai songon na mardalan tabolus angka taon, disi dope hosanta diudut Debata. Ai songon asi ni roha ni ama-ama na manjagahon anakhonna, umbalga sian i do asi ni roha ni Tuhanta manjaga hosanta. Taparhatopot do di ngolunta, paboa na so haramotan hita dirinta. Pinuji ma Debata dibaen sude denggan ni basaNa mangalehon na hasea di hita jolma pardosa. Nuaeng pe, taelekhon ma tu Tuhanta Pardenggan basa i marhite na rap hita mangendehon:
S:  Mangendehon Reff BE No. 792 ”Pasupasu hami on Tuhan”
     Pasupasu hami O Tuhan, Sai usehon dameMi, Sai ampehon tanganMi Tuhan, lehon di au gogoMi.
L:  Nunga salpu sada taon sian ari-ari ni ngolunta, alai ndang na olo salpu ianggo asi ni roha ni Debata. Dibahen i do ingkon sai pujion ni rohanta Ibana, ala ni godang ni asi ni rohaNa mangaramoti ngolunta. PangaramotionNa dohot holong ni rohaNa i do na mangonjar rohanta mandok mauliate tu Tuhanta Pardenggan basa i marhite partangiangan Bona taon on. Nuaeng pe tapangidohon ma tu Tuhanta Pardenggan basa i:
S:  Mangendehon Reff BE No. 792 ”Pasupasu hami on Tuhan”
     Pasupasu hami O Tuhan, Sai usehon dameMi, Sai ampehon tanganMi Tuhan, lehon di au gogoMi.
L:  Mauliate ma rohanta tu Debata, ala diramoti ngolunta sahat tu tingki on, dilehon do tu hita sipanganon dohot paruloson, jala dipasupasu do ngolunta marhasonangan. Tutu marsingkat sorin do partingkian taadopi di ngolunta, adong do sian keluarganta na matean, na rugi, na agoan, na dapot karejo dohot na so dapotan karejo. Sipata jut pingkiranta jala sipata marsak hita. Nuaeng, dilehon Debata do tu hita apul-apul na margogoihon hita, ai diudut Debata do hosanta paidaida hita saleleng mangolu di portibi on. Alani i tung gomos ma tapangidohon sian nasa roha dohot haporseaonta tu Tuhanta Pardenggan basa i. Laos jongjong ma hita saluhutna.
 S: Mangendehon Reff BE No. 792 ”Pasupasu hami on Tuhan”
     Pasupasu hami O Tuhan, Sai usehon dameMi, Sai ampehon tanganMi Tuhan, lehon di au gogoMi.
13. Tangiang Panutup: Ale Amanami – Pasupasu –
      Amen 3X diendehon

II. Acara Pesta diatur tersendiri

Tapatuduhon ma hinadenggan ni na marhahamaranggi, na sahundulan dibagasan Tuhan i (Psalm 133: 1 – 3)
Marhite Partangiangan Bona Taon Siraja Nabarat, Boru, Bere, Ibebere Sa Pekanbaru on, lam marsitoguan ma hita tu hamajuon i.

Tidak ada komentar:

Poskan Komentar