Jumat, 13 Mei 2011

Acara Minggu Exaudi Pesta Parheheon Seksi Parompuan HKBP SUKAJADI RESORT SUKAJADI


Sian Jahowa do ina na pantas marroha
Tatopoti ma dosanta tu debata!
01. Marende No 09: 1 + 6 “Hupuji holong ni rohaMu” 
1.      Hupuji holong ni rohaMu o Tuhan Jesus Rajangki. Tu Ho hulehon ma tondingku ai i do pinangidoMi. Huhalupahon ma diringku, mamingkir holong ni rohaMu. Jongjong
6.     O Jesus uhir ma goarMu torang bagas tu rohangkon. Asa tarsurat di jolongku holong ni rohaMi tongtong. Hatangku ro di parangengku ingkon di puji do goarMu.  
02. Votum – Introitus - Tangiang:  (L=Liturgis; H= Huria; Pr= Parompuan; A= Ama; Nb= Naposo Bulung; S= Sude)
L:   Marhitehite Goar ni Debata Ama, AnakNa Tuhan Jesus Kristus dohot Tondi Parbadia na manompa langit dohot tano on. Amen. Songon on do didok Tuhan Jesus: Lehonon ni Amamuna na di banua ginjang i do Tondi Parbadia tu angka na mangidohonsa.
Pr:  Sai tangihon ma soarangku ale Jahowa molo joujou ahu. Didok rohangku, Ho mandok: Lului hamu ma bohingKu! Antong bohiM ma na hulului ale Jahowa.
A:   Sai unang ma tabunihon bohiM maradophon ahu. Jahowa do Panondangi di ahu dohot hatuaonku, tung mida ise ma mabiar ahu? Jahowa do Partanobatoan ni ngolungku, tung mida ise ma ahu biahaton?
L:   Nunga tangkas huboto sangkap angka na husangkapi taringot tu hamu ninna Jahowa, sangkap hasonangan do tahe, ndada tu hamagoan, asa Ahu mangalehon tu hamu ujung ni na hinalungunhonmuna. Jadi pajoujouon-muna ma Ahu, huhut laho hamu martangiang tu Ahu, gabe tangihonongKu ma hamu. Taendehon ma: Puji  Tuhan.
S:   Mangendehon: Puji Tuhan - Puji Tuhan - Puji Tuhan.
L:   Martangiang ma hita: Ale Tuhan Debata! Pargogo na so hatudosan, Amanami na di banua ginjang! Usehon ma TondiM nabadia i dohot hapistaran na sian Ho i tu saluhut HuriaM, asa lam rarat jala lam hot hataM nabadia i di tonga-tonga ni hami on.
H:   Patongtong ma huhut rohanami mangoloi Ho sahat ro di ujungna dibagasan haporseaon na ture, mamungka dung hupatupa hami pesta Parheheon Seksi Parompuan ni HuriaM HKBP Sukajadi on.
Pr:  Ale Tuhan! Buha i ma rohanami, jala patinggil sipareonnami tu hataM. Pargogoi ma hami, asa tongtong huradoti hami ulaon nami songon angka Parompuan di tonga-tonga ni Huria; keluarga nang masyarakat pe.    
L:   Sai urupi jala pargogoi ma hami mamuji dohot mangoloi Ho dipardalanan ni ngolunami, jala patau ma hami pasangaphon Ho dibagasan haporseaon na sintong. Ai Ho do Tuhan na mangolu dohot na manggomgomi hami di bagasan Tondi Parbadia. Asa tarjalo hami pasupasuM na sumurung i, paima sahat hami tu lambungMu di banua ginjang i.
S:   Amen. Hundul
03. Marende No. 385: 3 “ Dijouhon Jesus ro sude”   
     Tibu ma salpu tingkimi tudia na ma ho. Ai tingki parasian i so diargahon ho. Sotung ditoishon rohami joujou ni Jesus Tuhanmi. Masuhi ma adian i na sian Tuhan i. Sonang ni roha i, sonang ni roha i. Sonang ni roha i dilehon Jesus i.
04.     Patik Ni Debata: Poda 19: 14 - 17
L:   Patik ni Debata di hita di Pesta parhehehon Seksi Parompuan HKBP Sukajadi na tapatupa di tingki on, i ma na tarsurat di Poda 19: 14 – 17, na mandok:  Jabu dohot sinamot do teanteanan sian ama, alai sian Jahowa do anggo pardihuta na pantas marroha.
Pr:  Halosohon mambahen tarnenep modom, jala roha na marlanggelangge, ingkon rapar do.
L:   Manang ise na marateatehon tona, mangaramoti hosana do, alai sai na mate do manang ise na neang marpangalaho.
A:   Na pasali Jahowa do manang ise na mardenggan basa tu na pogos, jala Ibana mamaloshon denggan basana i tu ibana.
L:   Antong rap mangido gogo ma hita tu Tuhan Debata laho mangulahon patikNa i.
S:   Ale Tuhan Debata sai pargogoi ma hami mangulahon na hombar tu patikMi. Amen.
05. Marende No. 223: 1 + 2 “Husomba Ho Tuhan”  (Satonga soara)
1.     Husomba Ho Tuhan tangihon au. SangkapMu ma tongtong pasaut tu au. Lam ganda baenonMi holong ni rohangki. Sai lam gandai holong tu ho. Jongjong
2.  Uju na lilu au dao sian Ho, sai dilului Ho au laos jumpang do. Ala ni holong do rohangkinon di Ho, sai lam gandai holong tu Ho.   
06. Manopoti Dosa dohot Manjangkon Bagabaga ni Debata:
L:   Ale Tuhan Debata, Pargogo na so hatudosan jala Amanami! Hujou hami do goarMu na badia i, ala na targogot situtu hami di dosanami i. Sai marasi ni roha ma Ho mida hami on. O Tuhan Jesus Anak ni Debata na gabe jolma ala ni hami, na mate jala na hehe sian angka na mate, na manaek tu banua ginjang mangondihon hami. Asi ma rohaM di hami, sai patongtong ma di hami roha hamauliateon tu Ho.
Pr:   O Tuhan Jesus Anak ni Debata naung manaek tu banua ginjang mangon-dihon hami jolma pardosa. Hupaserep hami ma nuaeng rohanami di-adopanMu nabadia i mangido sian Ho: Suru ma TondiM na badia i mangarajai roha dohot ateatenami, asa tung sabam rohanami mangoloi Ho. Asi ma rohaM di hami, sesa ma saluhut dosanami.
A:    O Tuhan Jesus Anak ni Debata! Ho do Ulu ni saluhut na porsea, ruasMu do hami. Ho do hangoluan dohot hasonangannami. Sai patau ma hami mangalehon tu Ho na sa hasangapon. Sai taiti ma rohanami tu Ho, urupi ma hami jala patongtong mangalo dosanami.
Nb:  Paias ma rohanami be, parangenami baen ture nang panghataionnami. Tompa ma roha na imbaru di hami asa haru monang hami maralohon nasa dosanami.
       (Martangiang ma hita manopoti dosa dibagasan rohanta loas marende ma Song leader mangendehon: BE No. 162: 1 + 6 “O Debata mansai balga”
(1) O Debata mansai balga huhut dokdok dosangku, na so adong di tano on na tau haporusanku; (6) Ajari au na jat padao paias ma rohangku. Naeng unduk do au on di Ho. HataM naeng oloanku.
L:   Hamuna angka dongan na hinaholongan! Tajangkon jala tahangoluhon ma bagabaga ni Debata taringot tu hasesaan ni dosanta: “Songon on do Hata ni Tuhan Jahowa: Nunga di arsahi ho Ahu marhite sian angka dosam, jala nunga dilojai ho Ahu marhite sian angka hajahatonmu. Ahu tutu, Ahu sandiri manalesei angka pangalaosim ala hadirionKu, jala ndang be Hupaingotingot angka dosam”. Hasangapon ma di Debata na di ginjang.
S:   Amen. Hundul
07. Marende No. 467: 1 “Asi ni rohaM hupuji”
Asi ni rohaM hupuji ala Ho manobus au. Dipaias Ho rohangku gabe soranganMu au. IngananMu rohanami TondiMi manggohi i. Pangke dohot ngolunami gabe ulaulaMi.  
08. Epistel: Mateus 14: 22 – 33 (Dijaha secara Responsoria)
L: Tajaha jala tahangoluhon ma Hata ni Debata, turpuk Epistel di Minggu Exaudi sadari on, i ma na tarsurat di Mateus 14: 22 – 33, tajaha ma secara responsoria.
L: I ma sahatna. Martua ma na manjaha dohot na tumangihon Hata ni Debata, lumobi ma na mangulahonsa sian na sa rohana di bagasan Tuhan i.
S: Amen.
09. Marende No. 763:  1 - 2 “Molo Jesus donganmi las roham”
1. Molo Jesus donganmi las roham, Jesus i pangurupim las roham, hot haporseaonmi dohot pos ni rohami. Mardonganhon Jesus i, las roham.
     Ref. Las roham, las roham, mardonganhon Jesus i las roham, mar-sinondang ma di ho, Bintang panghirimon i, mardonganhon Jesus i las roham. Jongjong
2.  Molo Jesus donganmi las roham, jagaonNa tondimi las roham, tiruonmu ma tongtong, dame nang holongNa i, saleleng dingolumi las roham. Las roham, las roham......!
10. Manghatindangkon Haporseaon:
L: Tahatindanghon ma haporseaonta i rap dohot donganta sahaporseaon di sandok portibi on, Rap ma hita mandok:
S: Ahu porsea.......! Hundul
11. Tingting:
12. Marende No. 390: 1 -..... “Nunga sae dosam” (Pelean Ia & Ib)
1.     Nunga sae dosam ulaning malum ho. Naung diauhon ho mudarNa i, Ai ias do ho na saksak bajumi na di auhon ho mudarNa i.
Reff: Ias ho, malum ho dibaen mudar ni Tuhanta i. Ai naung saksak bajum songon hapas i. Ai ias ho dibaen mudar i.
2.     Naung solhot ho jongjong tu parsilang i. Naung niuras ni mudarNa i. Sauduran ho dohot Tuhanta i Ai ias ho dibaen mudar i. Ias ho, malum ho...
3.     Ai rade ho molo ro Tuhanta I ai ias ho dibaen mudar i, boi di tomu ho Tuhanta Jesus i. Ai ias ho dibaen mudar i. Ias ho, malum ho…..!
4.     Tung hatop ma ho mamuri rohami. Boi ias ho dibaen mudar i. Sai bagas mangungkor ho tu mual i. Ai na malum dibaen mudar i. Ias ho, malum ho..
13. Jamita: Panguhum 10: 10 – 16                                Byv. Kamsia br. Sinaga
14. Marende No. 585: 1-.... ”Somba ma Jahowa”  (Pelean II)
1.      Somba ma Jahowa Debatanta Amen haleluya, Sigomgom langit tano on ro di isina Amen haleluya. Beta hita lao marsinggang tu joloNa Amen Haleluya na songkal jala na badia do Jahowa Amen haleluya. Endehon Amen haleluya, endehon Amen haleluya, endehon Amen haleluya, endehon Amen haleluya. Endehon Amen haleluya endehon Amen haleluya.  
2.      Puji ma Jahowa Debatanta Amen haleluya, Parasi roha na sumurung do Ibana Amen haleluya. Taendehon ma goar ni Debatanta Amen Haleluya alani denggan ni basaNa na tu hita Amen haleluya. Endehon Amen hale-luya, endehon Amen haleluya, endehon Amen haleluya, endehon Amen haleluya. 
3.      Sangap di Jahowa Debatanta Amen haleluya, Nabonar jala marmulia do Jahowa Amen haleluya. Tapatimbul ma goar ni Debatanta Amen Haleluya na tigor jala na sun gogo salelengna, Amen haleluya. Endehon Amen haleluya, endehon Amen haleluya, endehon Amen haleluya, endehon Amen haleluya.. 
15.     Tangiang Pelean - Ale Amanami - Pasupasu – Amen 3 X diendehon

Tidak ada komentar:

Posting Komentar