Minggu, 08 Mei 2011

Acara Minggu Ujung Taon Parhuriaon (Parningotan di Na monding)

“Taparade ma dirinta mangadopi paruhuman ni Kristus”
01. Song Leader mangendehon: BE No. 449: 1+4 (Ditingki diendehon ende on martangiang ma hita tu Tuhanta i).
       1. Sai solhot tu SilangMi, Jesus ingananku. Mual na mabaor disi, i ma pujionku. Ref. SilangMi, Tuhanki, i ma pujionku. Paima sogot sahat au, I endehononku. 
       4. Laos maniop silangMi, sai paimaonku. GokkonMi tu surgo i, tu siteanonku. SilangMi.......!
02. Jou-jou tu parsaoran na badia: (L=Liturgis, H=Huria, S=Sude)
 L:   Hamuna angka dongan sahaporseaon di Tuhanta Jesus Kristus! Na marpungu do hita sadari on marningot angka donganta naung jumolo monding. Naeng ma lobi umbagas uhir tu rohanta lapatan ni hamatean i. Ia Hamatean, i ma ujung ni ngolu ni jolma di portibi on, maradian ma ibana sian sandok ulaonna. Adong do haluaon di angka na porsea paboa Jesus Kristus naung hehe i do pangoluhon jolma sian na mate, Ibana do Tuhan ni na mangolu dohot na mate.
 H:   Dijou do nang hita asa mangolu dibagasan habengeton, pang-hirimon dohot holong ni roha. Ibana ma tutu gogonta laho mangeahi siteanon na manongtong i. Ai didok do: Teanon ni na monang i ma saluhutna; jala Ahu gabe Debatana, ibana gabe anakKu. Magira ma Ahu ro tiop ma na di ho, unang adong na mambuat tumpalmi !
 L:   Di na ro tingkina, unang tardapot be hita angka halak na mandele, jala na so porsea tu Ibana. Ai di haroro ni tingkiNa i, begeon ni saluhut halak na di angka tanoman i ma soarana. Dung i ruar be ma: Angka sibahen na denggan hehe tu hangoluan; alai angka siula na jahat hehe tu uhum.
 H:   Didok Tuhan Jesus: BahenongKu ma na monang i gabe tiang di joro ni DebatangKu, na so tupa be ibana ruar sian i, jala surathononKu ma tu ibana Goar ni DebatangKu dohot goar ni huta ni DebatangKu, i ma Jerusalem na imbaru i, na tuat sian banua ginjang sian DebatangKu, nang goarHu na imbaru i.
 L:   Antong! Dibagasan haporseaon na mangolu tu Tuhanta i. Tasombahon ma tangiangta dohot pujipujianta tu Ibana gogo ma taendehon: Aut na saribu haliganda saringar ni soarangki.
S:  Mangendehon No. 15: 1 + 8 “ Aut na saribu hali ganda“
1.   Aut na saribu haliganda, saringar ni soarangki, Naeng nasa gogo bahenonku, mamuji Debatanta i. Paboa las ni rohangki, Hinorhon ni pambaenNa i. Jongjong
8.   Sai pujionku do basaMu, saleleng na mangolu au. Pasangapon-ku do goarMu, saleleng na marhosa au. Maradu tos pe hosangki, naeng pujionku sangapMi.
03. Votum –Introitus -Tangiang:
L:   Marhitehite Goar ni Debata Ama, AnakNa Tuhan Jesus Kristus, dohot  Tondi Parbadia, na manompa langit dohot tano on. Amen. Songon on do Hata ni Tuhan Jesus: Na monang i do siparulosan dohot angka ulos na saksak, jala ndang sesaongKu goarna sian pustaha hangoluan, jala parhatopotongKu do goarna di jolo ni Damang dohot di jolo ni angka surusuruanNa.
H:           Songon duhut-duhut do nasa daging jala songon bunga-bunga ni duhut-duhut i do saluhut hasangapon ni jolma. Nunga malos duhut-duhut i jala nunga marurus bunga-bungana i, alai na hot do Hata ni Tuhan i ro di saleleng ni lelengna.
L:     Sai burju ma ho rasi rasa mate, dungi lehononKu ma tu ho tumpal hangoluan i. Taendehon ma Haleluya.
S:    Mangendehon  “Haleluya - Haleluya – Haleluya
L:    Martangiang ma hita : Ale Tuhan Jesus, Tuhan ni angka na mate dohot angka na mangolu! Ho do nampuna hami, mangolu manang mate pe hami. Nang pe mardalan hami di rura ni linggoman ni hamatean, ndang huhabiari hami be hamatean i, ai Ho do dongannami. Ndang tartiop hamatean manang tanoman i be hami, ai Ho do Tuhannami naung humophop hami, jala Ho do nampuna hami. Ro do hami nuaeng mangido tu Ho sian nasa rohanami:
S:    Sahat tu Ho ma daging dohot tondinami, asa di Ho hami, mangolu manang na mate pe. Sai tiop ma tangannami, urupi ma hami marhitehite panghophopMi, asa sahat hami tu hangoluan na so ra suda i. Amen. Hundul
04. Koor – Marende No. 298: 3-4 “Di lambungMi O, Jesuski”
3.  Di lambungMi O Jesuski, ndang be margogo musu i. Lam talu do na jahat i, lam monang do na denggan i. O, tua ni naung domu i tu Tuhan Jesus, Rajangki.
4.  Di ajalhi, O Jesuski, momos ma tiop tanganki. Pasahat au tu surgoMi,  marnida hasangaponMi. Endehononku ma disi holong nang denggan basaMi.
05. Patik ni Debata: Kolose 3: 1 – 4; Gal 3: 13; 6: 9 – 10.
 L:   Asa molo naung rap hamu dipahehe dohot Kristus, jalahi hamu ma angka na di ginjang; ai disi do Kristus, hundul di siamun ni Debata. Angka na di ginjang i ma parrohahon hamu, unang ma angka na di tano on! Ai nunga mate hamu, jala buni do hangoluanmuna raphon Kristus di bagasan Debata. Alai ia dung gabe patar sogot Kristus, hangoluanta i, disi ma gabe patar nang hamu raphon Ibana di bagasan hasangapon. Kolose 3: 1 – 4.
H:    Ditobus Kristus i do hita sian bura ni Patik i, di na hona bura Ibana  humophop hita. Galatia 3: 13.
S:    Alai unang marnaloja hita mambahen na denggan, ai na manggotil do hita muse di tingkina i, anggo so pargale hita nuaeng. Galatia 6: 9
L:    Antong, binsan sadihari dope, taulahon ma na denggan di saluhut halak, alai gumodang ma tu donganta sahaporseaon. Galatia 6: 10. Antong, rap mangido gogo ma hita tu Tuhan Debata laho mangulahonsa.
S:    Ale Tuhan Debata, sai pargogoi ma hami mangulahon na hombar tu PatikMi. Amen.
06. Koor – Marende No. 176: 2, 7 “Namungkap do surgo”    
2.  Dosam do tinaonNa di Golgata i. Disi dipasae do sude utangmi, disi dipasae do sude utangmi. Jongjong
7.  O, Jesus sai Ho do parjambaranki, pasonang rohangku, pasabam ma i, pasonang rohangku, pasabam ma i.
     (Ditingki on ma hita martangiang tu Tuhanta mangido hasesaan ni dosanta, diiringi Orgel sa-ayatna i).
07. Tangiang manopoti dosa / Baga-baga ni Debata :
L:    Hamuna angka dongan na hinaholongan ni Tuhan Jesus. Nunga jongjong hita nuaeng diadopan ni Debata na mamereng torus tu bagasan rohanta. Marragam do pergu-mulanta na mangkorhon dosa di ngolunta. Pos ma rohanta di Ibana, basa do Ibana manesa sude dosanta. Asa tung sonang rohanta mang-hangoluhon Asi ni rohaNa nang Pasu-pasuNa di ngolunta siganup ari. Taendehon ma tangiangta tu Ibana:
S:    Mangendehon BE No. 207: 1 – 2 “ Sai tiop ma tanganku“.
1.     Sai tiop ma tanganku, sai togu au. Paima tos hosangku ramoti au. Ndang olo au mardalan sasada au. Sai Ho ma ale Tuhan, manogu au.
2.     Baluti ma rohangku na marsak i, tu asi ni rohaMu, na godang i. Sai sesa ma dosangku asa tongtong. Guru di Ho rohangku tu jolo on.
L:     Ale Tuhan Debata! Ho do na maniop tangannami saleleng mangolu hami diportibi on. Hape jotjot do torbang hurajumi hami dirinami, lobi sian na patut, jotjot do hami marroha hajengkelon maradophon Ho nang maradophon dongannami jolma. Ndang hupaserep hami dirinami di adopanMi. Natar-solsol bagi do hami nuaeng ala ni dosanami i. Mauliate ma di Ho Tuhan, ala nunga di sesa Ho nasa dosanami.
H:           Ale Tuhan Debata! Mansai jotjot hupangasahon hami dirinami di portibi on. Mabiar jala angka hitir hami marnida dohot umbege barita na masa di portibi on, lam jonok huhilala hami ujung ni saluhut. Hape ndang huula hami lomo ni rohaM, gariada tahe lomo ni rohanami do hupasaut hami. Nunga manimbil hami sian dalanMu na tigor i, marhite tubutubu ni rohanami na roa i. Nuaeng, ro do hami tu adopanMu na badia i sumombahon elek-elek dohot tangiangnami tu adopanMu nabadia i.
L:    Sai ingot ma hami Ale Tuhan, hombar tu Asi dohot holong ni rohaM. Mauliate ma rohanami di Ho, jalo ma tangiangnami.
S: Mangendehon No. 207: 5 “ Sai tiop ma tanganku“.
Sai tiop ma tanganku, sai togu au, paima tos hosangku dongani au. Pabulus ma langkangku tu surgo i; Ho ma pasangaponku tongtong disi.
L:    Ale Tuhan Debata, Parasi roha na sumurung, na ro do hami tu joloM manopoti dosanami na godang i. Mansai jotjot hulaosi hami panghophopMi, ndang hutangihon hami soara ni TondiM nang HataM. Ndang huingot hami, nang hami pe ingkon tadingkonon-nami do portibi on, ia dung ro panjouM tu hami. Antong, mauliate ma di Ho Tuhan, ala nunga di sesa Ho luhutna dosanami.
S:    Amen.
L:    Tajalo ma Bagabaga ni Debata taringot tu hasesaan ni dosanta: Songon sintong na mangolu Ahu, ninna Tuhan Jahowa, tung na so lomo do rohangku mida hamatean ni parjahat, na lomo do rohangKu mida hamumulak ni parjahat i, tumadingkon dalanna, asa mangolu ibana.  Hasangapon ma di Debata na di banua ginjang.
S:    Amen.  (Hundul)                
08. Marende No. 435:1-2 “Marolop-olop Tondingki”
1.   Marolop-olop tondingki ai naung ditobus Jesus i. Hamu sude, bege ma i, sai las rohangku mandok i. Sonang ni tingki i, dung jumpang Jesus Tuhanki! TondiNa mangajari au, tarbahen marlas ni roha au! Sonang ni tingki i dung jumpang Jesus Tuhanki.
2.   Dihaol holongNa rohangki, tung na so boi be mago i. MataNa do manatap au, pinggolNa tumangihon au. Sonang ni.....!
09. Koor - Epistel: Hesekiel 39: 1 - 7
L: Nuaeng, tabege jala tajaha ma Hata ni Debata turpuk Epistel di  Minggu ujung taon parhuriaon, parningotan di angka naung monding sadari on, i ma na tarsurat di Hesekiel 39: 1 - 7: na mandok: Ia ho ale anak ni jolma, manurirangi ma ho dompak Gog jala dohononmu ma: Songon on do hata ni Tuhan Jahowa: Ida ma, na ro ma Ahu marlulu dompak ho ale Gog, induk sian Ros, Mesek dohot Tubal. Jala Ahu paundarhon ho jala Ahu mangela ho dohot panangkokkon ho sian ujung ni utara sahali, huhut parohon ho tu atas ni angka dolok Israel.
H: Jala Ahu mameuthon siormu sian tanganmu hambirang Ahu huhut mameuthon angka sumbiami sian tanganmu siamun.
L:  Ingkon di atas ni angka dolok Israel ho marragean rap dohot sude parduaan ni paranganmu, ro di bangso angka na hinaram; tu angka pidong panoro, parhabong na marragamragam dohot tu binatang di harangan lehononKu ho sohalanna.
H: Ingkon di atas sisik ni ladang i ho marragean, ai Ahu manga-lumbahon songon i hian, ninna Tuhan Jahowa.
L:  Jala Ahu manongoshon sada api tu bagasan Magog dohot tu tongatonga ni halak na maringan marsonangsonang di angka pulo, asa tung ditanda nasida, Ahu do Jahowa.
S:  Jala Ahu pabotohon goarHu na badia i di tongatonga ni bang-songKu Israel, jala ndang be marlea bahenonKu goarHu na badia i, asa tung ditanda angka bangso parbegu, Ahu do Jahowa, na badia di tongatonga ni Israel!
L:  Martua ma na tumangihon Hata ni Debata jala na umpeopsa!
S:  Amen.
10.Koor – Marende No. 213: 1 + 4 ” Dung sonang rohangku“
1.   Dung sonang rohangku dibaen Jesus i, porsuk pe hutaon dison, na pos do rohangku di Tuhanta i, di pasonang tongtong rohangkon. Ref. Sonang do, sonang do dipasonang tongtong rohangkon. Jongjong
4.   Mangolu nang mate, di Jesus do au, Ibana haporusanki. HataNa sambing do partogi di au, ai na tau haposanku do i. Sonang do…..!
11. Manghatindanghon Haporseaon :
L:  Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:
S:  Ahu porsea......! Hundul
12. Koor - Tingting na masa di Huria:
13. Acara Parningotan di na monding:
     1. Hata huhuasi  di Parningotan di na monding:
L:   Huria ni Tuhanta! Sadari on, Minggu, Tgl. 21 November 2010, nunga sahat hita tu Minggu Ujung taon parhuriaon, na somal digoari Hurianta: “PARNINGOTAN DI ANGKA NA MONDING”. Di Minggu parpudi ni taon parhuriaon do di patongon angka Ama ni Huria na parjolo i PARNINGOTAN DI ANGKA NAMONDING, ala di timbangi rohanasida, disi do marujung sada taon parhuriaon, jala ditogu-togu ma roha ni Huria i mananda ujung ni ngoluna huhut marningot di Hata ni Tuhanta na mandok:
H:  Ai laho salpu pe sogot langit dohot tano on, anggo angka Hatangki ndang na olo salpu” (Mat 24: 25). NALAHO SALPU DO SALUHUTNA NA DI PORTIBI ON, HOLAN DEBATA DO NAHOT RO DI SALELENG NI LELENGNA”.
L:   Adong do dua tujuan ni Hurianta patupahon PARNINGOTAN DI ANGKA NA MONDING, i ma: Na marningot do Hurianta di angka ruasNa naung jumolo monding di ganup jumpang ujung taon parhuriaon. Marningot ma nang hita sude ruas ni HuriaNa taringot tu ari hamamatenta sandiri, jala tau ma hita pasahathon tondinta tu Debata Parasi roha i. Ai Ibana do nampuna ngolunta. Na dua bagian on do na ingkon tongtong marsaringar di ngolunta di natapatupa PARNINGOTAN DI ANGKA NA MONDING sadari on. Molo tapatupa pe PARNINGOTAN DI ANGKA NA MONDING, ndang na mangarungkari sitaonon manang parungkilon na taadopi Hurianta disi, alai laho patoguhon haporseaonta ma i di hadodomu ni angka na porsea i tu Debata, dohot pahothon rohanta do i manghirim di Hata ni Tuhanta na mandok:
  H:  Ai di banua ginjang do sambulo ni tondinta; sian i do tapaimaima Sipangolu hita, Tuhan Jesus Kristus i. PaubaonNa do dagingta na lea on, gabe doshon dagingNa na sangap i, hombar tu hagogoonNa i, ai tarpatunduksa do saluhutna tu Ibana (Pilipi 3: 20 – 21). 
L:   Onpe, hamu angka donganku nahinaholongan, marsihohot jala so mubauba ma hamu, jala lam sumurung ma tong-tong di bagasan ulaon ni Tuhan i, ai diboto hamu do: ndang magopo halojaonmuna di bagasan Tuhan i (1 Kor 15: 58).
H : Mangendehon BE No 731: 1” Benget ma ho”
      Benget ma ho di parungkilonmi ai Jesus donganmi. Benget ma ho, rahis pe dalan i ditiop tanganmi. Na ro do Raja Sipar-monang lao mangurupi asa monang. Benget ma ho.
2.  Manjaha Goar-goar ni na monding di HKBP Sukajadi di taon parhuriaon  2009 – 2010 on:
3.  Marende No. 347:1+ 3 ”Sai masipaidaan“
(Laos jongjong ma hita saluhutna)
1. Sai masipaidaan  do na porsea i, dung sahat be langkana tu hasonangan i, tu hasonangan i, tu hasonangan i.
3.  Sai masipaidaan ma hita on muse. Di lambung ni Tuhanta, dung monang hita be, dung monang hita be, dung monang hita be.
4.  Tangiang pangondianon diuluhon sahalak Parhalado:
14. Marende No. 474: 1-....”Ingkon Jesus do donganku”      (Pasahathon Pelean Ia & Ib)
1.     Ingkon Jesus do donganku, sahalangku lilu do. Raphon Jesus boi au monang, talu musu i na ro.
Ref. Ndang mabiar au disi, Tuhan Jesus donganki. Sai ihuthononku Jesus oloanku nama i.
2.     Ingkon Jesus do donganku, molo marsitaonon au. Tu Ibana hutinggangkon, nasa na pasorat au. Ndang mabiar au ...!
3.     Ingkon Jesus do donganku, molo na tarunjun au. Tuhan Jesus do parmonang, di parmonang dohot au. Ndang mabiar au.....!
4.     Ingkon Jesus do donganku, molo ingkon mate au. Holan mudar ni Tuhanku golomongku di na lao. Ndang mabiar au.....!
15. Jamita: 2 Korintus 5: 1 - 10
16. Marende No. 522: 1-...”Surgo i sambulonta do i”  (Pel II)
1.     Surgo i sambulonta do i, ndang adong be siaeon disi, na mamuji tongtong na disi, pinalua ni Tuhanta i.
Ref. Surgo i, surgo i, ndang adong be siaeon disi, surgo i, surgo i, surgo i, ndang adong be siaeon disi. 
2.     Na marloksa naung sahat tusi, tu inganan nasai denggan i, Aut naung domu ma au dohot i, gok ma las ni rohangku di si. Surgo i..!
3.  Na manghirim rohangku dison, paima sahat tusi nang au on. Taiti au, ale Tuhan tusi, asa rap dohot Ho au disi. Surgo i.....!
4. Holan sada na ma holsongki: Unang tading haholonganki. Na tu au pinalumehonMi, nang nasida sai togu tusi. Surgo i…...!
17. Tangiang Pelean - Ujung Taon Parhuriaon – Ale Amanami – Pasupasu – Amen 3X diendehon.

Tidak ada komentar:

Posting Komentar