“Tuhan Jesus sahat tu tangan ni jolma asa diparsilangkon”
01. Marende No. 81:1 + 8 “Jesus mual ni tondingku”
1. Jesus mual ni tondingku Sipangolu tondingki. Ai dibunu Ho musungku, i ma hamatean i. Ho manaoni hamagoan, patupahon hangoluan. Ala ni hupuji Ho, tung marribu hali do.
~~~Jongjong ma hita saluhutna~~~~
8. Sai pinuji ma goarMu ala ni na bernit i. Dohot ala ni mudarMu Jesus na nilehonMi. Lao pasaehon dosanami asa unang mago hami. Ho hupuji alani salelenglelengna i.
02.Votum – Intoritus – Tangiang:
L: Marhitehite goar ni Debata Ama, anakNa Tuhan Jesus Kristus dohot Tondi Parbadia. Amen. Dung i laho mandapothon huta Jerusalem, sahat ma nasida tu sosor Betpage, mardonokkon dolok Jetun. Sian i ma disuru Jesus siseanNa dua halak. Ninna ma: Laho ma hamu tu sosor na di jolomuna an, mamintor jumpang hamu ma disi tambat halode sada rap dohot anakna; harhari jala togu hamu ma i tu Ahu!
A: Jadi molo tung adong na mandok hatana tu hamu, alusi hamu ma: Na ringkot do i di Tuhan i! Dung i pintor loasonna ma.
L: Alai masa pe sisongon i, asa jumpang na hinatahon ni panurirang i: Paboa hamu ma tu boru Sion: Ida ma, na ro ma Rajami manopot ho, na lambok do rohaNa; halode do hundulanNa dohot anak ni halode boban.
I: Dung i laho ma angka sisean i patupahon na nidokkon ni Jesus tu nasida. Diboan nasida ma halode i dohot anakna, diampehon ma ulosnasida tu ginjangna, laos dipahundul ma Jesus tu atasna i.
L: Deba sian natorop i pahembangkon ulosnasida tu dalan i, na deba nari manalliki angka ranting ni hau jadi dipanserakkon tusi.
S: Alai sude natorop i, angka na di jolona nang na mangihut sian pudi pe, mangolopolophon: Hosianna di Anak ni raja Daud! Pinasupasu ma na ro marhitehite Goar ni Tuhan i! Hosianna ma di ginjang!
L: Martangiang ma hita: Ale Amanami na di banua ginjang! Parasi ni roha na sumurung do Ho di saluhutna jolma. Ndang diolani Ho anakMu na sasada i tu hamatean, dilehon Ho do Ibana humophop hami, mamorsan dosanami sahat tu hau na pinarsilang i. Sai patogu ma rohanami asa unang ganggu rohanami manghaporseai Ho naung patupa hasesaan ni dosanami, asa unang mandele hami ala ni dosanami i, alai asa pos situtu rohanami di asi ni rohaM na godang i marhite Jesus Kristus Tuhannami, Anak haholongan ni rohaM. Amen. ~~~~~Hundul ma hita saluhutna~~~~~
03. Koor :
04. Marende No. 152:1 “Jesus na namorsan dosa ni portibi on”
Jesus na mamorsan dosa ni portibi on, pangolu hami. Jesus na mamorsan dosa ni portibi on, pangolu hami. Jesus na mamorsan dosa ni portibi on, sai pasonang hami. Amen, amen, amen.
05. Renungan Parjolo: BOASA PASTAPONMU AHU
L; Ditangkup ma Jesus, diihoti, ditogihon ma jumolo tu si Hannas, i ma simatua ni si Kayapas, Sintua ni malim di na sataon i. Si Kayapas on ma na mandok: Dengganan do mate sada halak humophop bangso. Alai diihuthon si Petrus dohot si Johanes do Jesus. Jadi dung bongot Jesus, disungkun sintua ni malim i ma Ibana taringot tu angka siseanNa dohot podaNa. On do alus ni Jesus: Patar do hatangKi di hatoropan. Na tongtong do Ahu mangajari di bagas parguruan nang di Bagas Joro ni saluhut halak Jahudi. Ndang adong Huhatahon marsibuni. Boasa Ahu sungkunonmu? Nasida naung umbege hatangKi ma sungkun! Diboto nasida do na Huhatahon i.
H: Dung didok songon i, dipastap sada opas na jongjong disi ma Jesus, huhut didok: Songon i pangalusiM tu sintua ni malim? Gabe ninna Jesus ma mangalusi: Ia na hurang na Hudok, hajongjongkon na hurang, alai anggo na hona do, boasa pastaponmu Ahu?
L: Gabe disuru si Hannas ma Jesus naung tinali i tu sintua ni malim Kayapas, disi do marpungu angka Sibotosurat dohot Sintua ni natorop. Alai sai mangihut-ihut do si Petrus mandaodao sahat tu alaman ni sintua ni malim i. Disisipi ma bongot tu bagasan, marnida ujungna; anggo angka sintua ni malim na disi sai dilului do panindangion gapgap, na tuk mambahen Jesus marutang hosa, alai nang pe hehe torop sitindangi gapgap ndang adong jumpangsa. Parpudi ro ma dua halak mandok: Didok halak on: Tarbahen Ahu do mangalohai Joro ni Debata jala pajongjonghonsa sumuang di bagasan tolu ari. Pintor hehe ma si Kayapas didok ma tu Jesus: Ndang alusanMu panindangion nasida na tu Ho? Alai sai hohom do Jesus. Gabe ninna i ma: Hupatolon ma Ho tu Debata Siparngolu i, asa dipaboa tu hami manang na tutu Ho Kristus, Anak ni Debata!
H: Gabe didok Jesus ma: Songon nidokmi ma tutu! Alai hudok ma tu hamu: Olat ni on ma idaonmuna Anak ni jolma i hundul di siamun ni hagogoon jala ro di atas ombun ni langit.
L: Gabe diribakhon sintua ni malim i ma paheanna, ninna ma: Na mangaleai Debata do Ibana! Pola luluan dope sitindangi? Nunga dibege hamu pangaleaiNa i! Beha do di rohamu? Dung i ninna nasida ma: Marutang hosa ma Ibana.
S: Jadi ditijuri nasida ma bohiNa, deba manompuhi, na deba mangalinsingi huhut ma didok: Surirangi hami Kristus, ise do mamunu Ho?
06. Marende BE No. 78:2 “O Ulu Na Sap Mudar”
O Bohi Parsinondang na sangap situtu, beasa tung marlangan, sap ijur hurumMu? Tung aha ma alana, umbaen homur mataM? Na mintop do sondangNa, di na lao tos hosaM.
07. Renungan Paduahon: MATE MANINGKOT SI JUDAS I
L: Na hundul do anggo si Petrus di alaman i. Didapothon sada parompuan ma ibana, mandok: Dohot do ho dongan ni Jesus na sian Galilea i. Alai diporso ibana do: Ndang huboto, jala ndang huantusi na ni dokmi. Laos ruar ma ibana tu alaman jolojolo, jala martahuak ma manuk. Alai, diulahi boruboru i do mandok tu angka na jongjong disi: On do sada sian nasida! Alai mamorso muse ma si Petrus.
H: Satongkin nari, didok angka na jongjong disi ma tu si Petrus: Ah, tongon do donganNa ho, ai halak Galilea do ho. Gabe dipam-buburahon si Petrus ma dirina manolonnolon: Ndang hutanda jolma nidokmuna i!
L: Dung i pintor martahuak ma manuk paduahalihon. Gabe diingot si Petrus ma hata ni Jesus: Tolu hali do soadahononmu Ahu andorang so martahuak manuk paduahalihon. Gabe tumatangis ma ibana. Dung diida si Judas parjehe i na naeng parsilanghononna Jesus, disolsoli ma rohana, dipaulak ma si 30 rupiah i tu sintua ni malim dohot tu sintua ni bangso i. Didok: Sala do ahu, ai hujehehon na so marpipot.
H: Alai didok nasida ma: Ndang ro di hami i! Ho do na sari disi! Gabe ditimpalhon ma perak i tu bagasan joro i laos sumurut maningkot. Dibuat sintua ni malim i ma hepeng i, didok ma: Ndang jadi padomuon i tu arta ni joro, ai tuhor ni mudar do i!
L: Jadi mardos ni roha ma nasida manuhorhonsa tu ladang ni pande hudon, bahen parbandaan di halak dagang. Ala ni i ma umbahen na margoar i ladang mudar sahat ro di sadari on. Alai sogot manogot i ditogihon ma Jesus tu Kantor. Ndang dibongoti nasida Kantor i, unang tarsubang laho manganhon Paska i. Ruar ma si Latus mandapothon nasida laho manungkun: Pangaluan dia do diboan hamu dompak Halak on? Dung i ninna nasida ma: Aut unang sibahen na jahat halak on, ndang tagamon pasahatonnami tu ho.
H: Alai ninna si Latus ma tu nasida: Boan hamu ma Ibana, uhum hamu ma marguru tu adatmuna. Alai ninna angka Jahudi ma mangalusi: Ndang jadi pusaonnami manang ise. Jadi dialuhon nasida ma Jesus, didok: Na dapot hami do On pabalikbalikhon bangsonami jala mangorai mangalehon guguan tu Kesar i. Dipandok, Raja Kristus do Ibana.
L: Jadi dibongoti si Latus ma muse Kantorna, dijou ma Jesus, disungkun ma: Atehe, Ho do Raja ni Jahudi? Ro ma alus ni Jesus: Na sian roham do na nidokmi, manang na nidok ni halak do i tu ho taringot tu Ahu? Gabe dialusi si Latus ma: Ai halak Jahudi do ahu? BangsoMi dohot angka sintua ni malim i do pasahathon Ho tu ahu. Aha do na binahenMu? Jadi dialusi Jesus ma: Ndang sian portibi on harajaonKu, aut sian portibi on harajaonKu, ndang tarbahen so mangalo angka naposongKu asa unang sahat Ahu tu tangan ni angka Jahudi. Alai ndang sisongon i harajaonKi.
I: Dung i ninna si Latus ma mandok Ibana: Asa Raja do Ho? Jadi ninna Jesus ma mangalusi: Songon na nidokmi ma tutu, Raja do Ahu! Umbahen na tubu Ahu jala umbahen na ro Ahu tu portibi on, asa Huhatindangkon hasintongan i. Ganup na sian hasintongan i, tangihonon ni i do soarangKu.
S: Jadi ninna si Latus ma mandok Ibana: Aha ma hasintongan i? Jadi dung didok sisongon i ruar ma ibana muse manopot angka Jahudi mandok tu nasida: Ndang jumpang ahu manang dia salaNa.
08. KOOR:
09. Marende BE. 81:4 “Sungsang duri ditumpalhon”
Sungsang duri ditumpalhon panginsahi i tu Ho, jala tolong dilibashon tu uluM, pasiak Ho. I ditaonhon Ho, Tuhanku, ala ni hajungkatonku. Ala ni hupuji Ho tung maribu hali do.
10. Renungan Patoluhon: DUA PARHOSOM MARKOLUSI
L: Alai lam digogohon nasida ma mandok: Digunturi Ibana do bangso i, ai mangajari do Ibana di sandok Judea mamungka sian Galilea sahat tuson. Umbege i si Latus disungkun ma Ibana: Manang halak Galilea Ibana. Dung diboto, na sian gonggoman ni si Herodes Ibana, disuru ma Ibana tu jolo ni si Herodes, ai tongon do Ibana di huta Jerusalem uju i.
H: Marnida Jesus, las situtu ma roha ni si Herodes; ai nunga leleng naeng idaonna Jesus, jala diarop rohanasida idaonna tanda halongangan sipatupaon ni Jesus. Jadi godanggodang ma disungkunhon tu Ibana; alai manghohom do Jesus. Disi do angka sintua ni malim ro di siboto surat, jala gogogogo do Jesus dialuhon. Ia si Herodes rap dohot donganna, direhei jala dilealeai do Ibana. Disolukkon ma pahean na arga tu Ibana, laos songon i ma disuru Ibana mulak tu si Latus. Jadi di na sadari i ma maraleale si Herodes dohot si Latus ai na marsihosoman hian do nasida na sailaon.
L: Peam do dipalua panguhum di pesta i sahalak parjahat manang tahanan, marguru tu panodoon ni na torop i. Adong na tarhurung uju i parjahat na sumalin na margoar si Barrabas. Di na pungu i nasida disungkun si Latus ma: Ise do dipangido hamu paluaonku: Barrabas manang Jesus na targoar Kristus? Nian diboto nasida do, late ni rohanasida umbahen dialuhon nasida Jesus.
H: Gabe sai disosoi angka sintua ni malim dohot sintua ni bangso i ma natorop, dipangido nasida ma asa “Malua si Barrabas, alai pusaon do ianggo Jesus”.
L: Dung i disungkun panguhum i ma muse: Ise sian na dua i dipangido hamu paluaonku? Gabe didok natorop i: Barrabas! Dung i didok si Latus ma muse: Antong, aha ma bahenonku tu Jesus, na targoar Kristus? Gabe saluhut nasida mandok: Parsilangkon ma! Alai ninna panguhum i ma: Ai aha ma na jahat dibahen? Alai lam gogo ma dipanjoujouhon: Parsilangkon ma!
11. Marende No. 407: 1 - 2“Panotnoti ma Silang ni Tuhanta i”
1. Panotnoti ma silang ni Tuhanta i na mamorsan sude dosami. Sai tingganghon sude arsak ni rohami. Pasesahon sude dosami. So jo bereng i. Panotnoti ma silang ni Tuhanta i, ngolumi, ngolungki sian i.
2. Tung beasa ditaon Ho Tuhan songon i. Dibagasan sude burjuMi. Tung beasa sap mudar sude dagingMi. Ai tigor do sude dalanMi. Nda i holongMi? MudarMi na use pasonanghon muse sasude na porsea disi.
12. Renungan Paopathon: DILINSINGI, DILEAI DO JESUS
L: Ditogu si Latus ma Jesus didokkon ma asa dilinsingi. Jadi didandani angka soldadu ma sungsang duri bahen tumpalNa. Diampehon ma i tu uluNa, dialithon ma baju dapdap tu dagingNa. Dung i dileai ma, jala didok: Tabi di Ho, ale Raja ni Jahudi. Laos dipastapi. Ruar ma muse si Latus, didok ma tu angka Jahudi i, ida hamu ma, hutogihon do Ibana tu jolomuna asa diboto hamu na so adong jumpang ahu salaNa.
H: Ruar ma Jesus manjujung sungsang duri, marbaju dapdap. Ninna si Latus ma: Ida hamu ma Jolma i! Dung diida angka sintua ni malim dohot natorop i Ibana, dipanjouhon ma: Parsilangkon, parsilangkon ma Ibana. Gabe didok si Latus ma: Boan hamu ma Ibana. Parsilangkon hamu ma; ai ndang jumpang ahu salaNa.
L: Dialusi angka Jahudi i ma, marguru tu patiknami ingkon marutang hosa Ibana, ai dibahen do diriNa Anak ni Debata. Umbege i, lam ganda ma biar ni si Latus. Dung i diulahi muse ma tu Kantorna, didok ma tu Jesus: Sian dia do Ho? Alai ndang dialusi Jesus ibana. Dung i didok si Latus ma tu Jesus: Ndang angkupanMu ahu manghatai? Ndang diboto Ho, marhuaso ahu paluahon Ho jala marhuaso parsilangkon Ho?
H: Gabe dialusi Jesus ma: Ndang adong huasom mangago Ahu, aut unang Nilehon i tu ho sian ginjang. Dibahen i gumodang do dosa ni na pasahathon Ahu tu ho. Jadi olat ni i, sai dilului si Latus ma dalan laho paluahon Ibana, alai sai manjujui do angka Jahudi, ninna nasida ma: Molo dipalua ho On, ndang aleale ni Kesar ho! Ai na mangalo Kesar, i do ganup na mambahen dirina gabe raja.
L. Dung dibege si Latus hata i, ditogihon ma Jesus haruar, dihunduli si Latus ma habangsa paruhuman na margoar: Pantar batu, anggo di hata Heber: Gabbata. I ma na masa di ari parhobasan Paska i, mareak hos ni ari. Dung i didok ma tu angka Jahudi: Ida hamu ma Rajamuna! Alai anggo nasida manjouhon: Padao, padao ma i; parsilangkon ma Ibana.
H: Didok si Latus ma tu nasida: Parsilangkononku ma Rajamuna? Dung i dialusi angka sintua ni malim i ma: Ndang adong rajanami dungkon ni Kesar i.
L: Dung diida si Latus, na so marguna be hatana, lam gaor tahe, dibuat ma aek mamuri tanganna di jolo ni na torop i huhut didok: Lias do ahu sian mudar ni On! Hamu do na sari disi! Alai ninna natorop i ma: Marsapata tu hami dohot tu ianakhonnami ma mudarNa i!
S: Saut ma dipalua si Barrabas; alai anggo Jesus dilinsingi, jala dipasahat ma, asa diparsilangkon.
13. Marende No. 426: 1 + 5 “Tutu na mate Jesus i”
1. Tutu na mate Jesus i humophop iba on. Durus di hau parsilang i murdarNa i tongon. Songon i tutu, songon i tutu. Umbaen na mate Jesus i siala au do i.
5. O Jesus sai urupi au, asi ma rohaMi. Dison do au sai togu au naeng saut tu lambungMi. Songon i tutu, songon i tutu. O Jesus sai urupi au saut ma tu lambungMi.
14. JAMITA:
15. Marende No. 687: 1–.... “SilangMi O Tuhan Pardameanki”
(Laos pasahathon pelean tu Huria)
1. SilangMi O Tuhan pardameanki. Parsigantunganku hangoluanki. Sombu do uashu sabam rohangki. MudarMi O Jesus hasonanganki.
2. SilangMi O Tuhan pardameanki. Sesa do dosangku dibaen holongMi. Talu do musungku tanggal rante i. HamamateMi do hamonanganki.
3. Sai haholonganku Ho o Tuhanki. Ndang tadinghononku salelengna i. Boan ma tondingku tu na sonang i. Huta sambulonku salelengna i.
16. Refleksi: Sahat Jesus tu tangan ni jolma asa diparsilangkon:
L: Hamuna angka dongan nahinaholong ni Tuhan Jesus! Nunga tapatupa partangiangan Passion na patoluhon di borngin on mar-ningot sitaonon ni Tuhan Jesus. Nunga sahat Ibana tu tangan ni jolma asa diparsilangkon. Nuaeng disulingkit do rohanta mandok: Boha do holong ni rohaM dohot haporseaonmu di naung sahat Jesus i tu tangan ni jolma asa diparsilangkon. Nuaeng pe taparade ma rohanta manopoti dosanta tu adopanNa nabadia. Ai saluhutna do hita nahinophop ni Tuhan Jesus. Antong! Dia ma dohononta diadopanNa nabadia i?
H: Natarsolsol bagi do rohangku paidaida dangolNa i. Marningot sasude dosangku na tinaonNa i. Mauliate ma rohangku di Ibana ala au tinobusNa i.
L: Nunga tahangoluhon sitaonon ni Tuhan Jesus. Songon tanda ni naung tasolsoli dosanta di adopan ni Debata, on ma tingki na denggan di hita paradehon dirinta laho manganhon parpadan Nabadia sipatupaonta marsogot di Jumat Agung, parningotan di ari hamamate ni Tuhanta Jesus. Antong! Taparade ma rohanta, asa tau hita manganhon parpadanan nabadia i. Ai angka na rade manolsoli dohot manopoti dosana do na tau manganhon parpadanan na badia i. Tatanda ma dirinta jolma pardosa di adopan ni Debata, huhut ma tapangidohon tu Ibana marhite na rap hita mangendehon:
S: Mangendehon No. 78: 5 “O ulu na sap mudar”
Las situtu rohangku huhut mansai sonang. Marningot panghophop-Mu di ahu nahinan. Ndang be huhabiari nuaning dosangki; tung mate au saonari, martua au disi.
17. Tangiang Pelean - Ale Amanami – Pasupasu –
Amen 3X diendehon
Tidak ada komentar:
Posting Komentar