Minggu, 08 Mei 2011

Acara Passion I (Parningotan di Panaonon ni Tuhan Jesus)

Tahangoluhon ma Sitanonon ni Tuhan Jesus!
01.  Marende No. 88:1 + 4 “Di surgo do alealenta”
1. Jesusku naung manobus ahu, sai naeng haholonganku Ho. Tu dolok Golgata Ho laho, nionjar ni holongMu do. Hupuji nasa asiMi, alai gumodang holongMi. ~~~Jongjong ma hita saluhutna~~~~
4.  Bagas uhirhon tu rohangku, panghophopMi humophop au. Tusi ma togu pingkiranku, guru di Ho sambing ma au. Hupuji nasa asiMi, alai gumodang holongMi.  
02.  Votum – Intoritus – Tangiang
L:    Marhitehite Goar ni Debata Ama, anakNa Tuhan Jesus Kristus dohot Tondi Parbadia. Amen. Ho do, ale Jahowa, dihalungunhon rohangku. Ale Debatangku, marhaposan tu Ho do ahu, unang tung paila ahu, asa unang marsuraksurak angka musungku mida ahu.
A:    Ndang tahe tagamon tarurak sude angka na manghaposi Ho, sai maila do sogot angka pangose soada alana.
I:      Ale Jahowa, sai pabotohon ma tu ahu angka dalanMu, jala ajarhon tu ahu angka bogasMu.
L:    Sai togutogu ma hami tu bagasan hasintonganMu, jala ajari hami, ai Ho do Debata ni hatuaonnami, Ho do na huhaposi hami ganup ari. Sai ingot ma, ale Jahowa, angka denggan ni basaM dohot asi ni rohaM, ai sian na robi do angka i.
H:    Sai unang paingotingot angka dosa ni haposoonnami dohot pangalaosionnami, sai ingot ma hami, ale Jahowa, hombar tu asi ni rohaM, ala ni denggan ni basaM.
S:    Pardengganbasa jala na bonar do Jahowa, ala ni dipodahon do dalan na tigor i tu angka pardosa.
L:    Martangiang ma hita: Ale Amanami, Debata ni hatuaonnami. Huingot hami do nuaeng panaonon dohot hamamate ni Jesus Kristus, Tuhannami. Pahibul ma rohanami mangauhon sude na tinaonNa i. Patandahon ma tu hami dosanami, asa huarsakhon hami jala hupompomi hami hisaphisap ni rohanami, asa hupasaut hami lomo ni rohaM, gabe martua jala mangolu hami marhite mudar ni anakMu, Jesus Kristus Tuhannami.
S: Amen.  ~~~~~Hundul ma hita saluhutna~~~~~
03. Koor :
04.  Marende No. 152:1 “Jesus na mamorsan dosa ni portibi on”
Jesus na mamorsan dosa ni portibi on, pangolu hami. Jesus na mamorsan dosa ni portibi on, pangolu hami. Jesus na mamorsan dosa ni portibi on, sai pasonang hami. Amen, amen, amen.
05.  Renungan Parjolo: PAINGOTINGOT JESUS NA TARPAJAL I:
L:    Tabereng ma induk ni haporseaon i, i ma Jesus na manaonhon parsilangon i, singkatta manaon hamatean, upa tinuhor ni dosanta. Paingotingot hamu ma Ibana, na tarpajal di silang i, asa unang marnaloja hamu, jala unang mandate tondimuna.
H:    Songon panghaholongiNa di angka na di Ibana, dihaholongi do nasida ro di ujungna.
L:    Di ari parhobasan parjolo Paska i, disungkun angka Sisean i ma Jesus: Tu dia ma patureonnami panganon Paska i, dipangido rohaM? Gabe didok ma: Laho ma hamu tu huta i manopot si Anu. Dok hamu ma tu ibana: Tona ni Guru i: Na dapot ne ma tingkingKu, di ho ma Ahu sorang laho mangan Paska i rap dohot siseanKu. Jadi saut ma disuru siseanNa dua halak jala didok ma tu nasida: Molo laho hamu tu huta, pajumpang do hamu disi dohot sada halak na mangusung aek sahudon, ibana ma ihuthon hamu. Tu ibana ma sungkun hamu: Didia do bilut inganan, asa disi hupangan hami Paska i? Jadi patuduhononna ma bilut parginjang sada, na lambas jala na tipak hinembangan, disi ma pature hamu di hita.
S:    Dung borhat sisean i, jumpang nasida ma hata ni Jesus i. Dipature ma Paska i. Dung botari, ro ma Jesus dohot siseanNa.
06. Koor :
07. Marende No. 81: 1 “Jesus mual ni tondingku”
Jesus mual ni tondingku Sipangolu tondingki. Ai dibunu Ho musungku, i ma hamatean i. Ho manaoni hamagoan, patupahon hangoluan. Ala ni hupuji Ho, tung marribu hali do. 
08.  Renungan Paduahon: DIBURI JESUS PAT NI SISEANNA:
L:    Di na mangan i, hehe ma Jesus, ditanggal ma ulosNa, dibuat ma basahan ditapolhon tu Ibana. Diusehon ma aek tu sambong, diburi ma pat ni angka siseanNa, dilap ma dohot basahanNa nangkin. Dung sahat Jesus tu si Petrus, didok ma tu Jesus: Tung Ho ma ale Tuhan mamuri pathu? Dialusi Jesus ma: Ndang diantusi ho pambahenanku na tu ho anggo nuaeng, muse pe botoonmu i. Didok si Petrus ma: Matua tano on, ndang burionMu pathu! Alai ninna Jesus do: molo so burionKu ho, ndang partohap ho di Ahu. Gabe ninna si Petrus ma:
H:    Ale Tuhan, unang ma holan pathu, dohot ma tangan dohot ulungku! Alai didok Jesus ma: Halak naung maridi i, ndang be burion, ai nunga ias. Naung ias do hamu, alai ndang luhut hamu.
L:    Asa dung diburi Jesus patnasida, dipangke ma muse ulosNa, dung i hundul ma Ibana, jala didok ma tu angka siseanNa: Diantusi hamu do pambahenanKi tu hamu? Digoar hamu do Ahu Guru dohot TUHAN, ture do pandokmuna i, ai i do AHU tutu. Asa molo Ahu Tuhan jala Gurumuna mamuri patmuna, tama ma nang hamu masiburian pat. Sitiruon do hulehon tu hamu, asa dibahen hamu songon naung Hubahen i tu hamu.
S:    Ndang umbalga anak somang sian indukna, ndang sumurung suruan sian na marsuru ibana. Molo diboto hamu i, martua ma hamu mangulahonsa!
09.  Marende No. 83:1 “Na Lao Do Birubiru i Mamorsan Dosa”
Na lao do birubiru i mamorsan angka dosa ni nasa hajolmaon i di benget ni rohaNa. Diporsan do sahitta i, dilehon do diriNa i tu tangan ni pamunu. Ditaoni do na bernit i, ro di na tos hosaNa i. Didok: Naeng porsanonKu.
10.  Renungan patoluhon: JONOK DO HAPE SIPARJEHE I:
L:    Uju mangan i nasida, ninna Jesus ma: Situtu do na Hudok on tu hamu. Sada sian hamu naeng pasahathon Ahu. Gabe marsak situtu ma nasida, dipandok be ma tu Jesus: Nda tung ahu i TUHAN? Alai ninna ma mangalusi: Ia i na rap dohot Ahu manurdukhon tanganna tu paringkauan, i do na pasahathon Ahu! Tong do nian ujung ni Anak ni jolma i songon na tarsurat hian; alai marjea do halak na pasahathon Anak ni jolma i. Tagonan unang sanga tubu ibana tu hasiangan on! Alai dihilap si Petrus ma si Johannes, haholongan ni Jesus i, ninna ma: Sungkun ma, ise na nidokNa i. Jadi dipajonok i ma tu Jesus, disungkun ma: TUHAN, ise i? Gabe dialusi Jesus ma: Ia tusi Hulehon na santopik na Husornophon on, i ma ibana.
H:    Jadi disornophon ma santopik, dilehon ma tu si Judas Iskariot. Dibondut ma i, dibongoti Sibolis ma ibana. Didok Jesus ma: Humatop ma ula siulaonmu. Gabe pintor laho ma ibana tu balian.
L:    Di na mangan i nasida, dihindat Jesus ma roti, dipasupasu, diponggoli jala diparlehon ma tu angka siseanNa, huhut didok: Jalo hamu, pangan hamu, dagingKu do on? Dung i dihindat ma panginuman, didok ma mauliate, dilehon ma tu nasida, huhut didok: Sude hamu manginum sian i, ai mudarHu do on, mudar parpadanan na niusehon humophop torop halak bahen hasesaan ni dosa. Alai hudok ma tu hamu, na so tupa be inumonKu olat ni on sian parbue ni hau anggur i sahat ro di ari sogot, disi ma inumonKu na imbaru rap dohot hamu di harajaon ni Damang. Dung diendehon nasida endeende pujipujian, ruar ma nasida tu dolok Jetun. Disi ma didok Jesus tu nasida:
H:    Saluhut do hamu naeng targasip mida Ahu di na saborngin on, ai na tarsurat do: Lombutanku ma Parmahan i, gabe marserak ma birubiru na sapunguan i.
L:    Alai ninna si Petrus ma mangalusi: Agia sude nasida targasip mida Ho, anggo ahu na so tupa targasip. Gabe didok Jesus ma tu Ibana: O Simon, Simon, nunga dipangido Sibolis naeng segeonna hamu songon dahanon. Alai Ahu do manangiangkon ho, unang mintop haporseaonmi. Jala dung mulak sogot roham, pargogoi ma roha ni angka hahaanggim! Alai ninna si Petrus do:
S:    Tuhan, na hobas do ahu mandongani Ho tu hurungan, nang tu hamatean pe! Alai ninna Jesus ma: Hudok ma tu ho, Petrus: Ndang martahuak manuk saborngin on, so jolo tolu hali soadahononmu na so tinandam Ahu.
11.  Marende No. 449: 1 + 3 “Sai Solhot tu SilangMi”
1. Sai solhot tu silangMi Jesus ingananku, mual na mabaor disi, i ma inumonku. SilangMi Tuhanki, i ma pujionku. Paima sogot sahat au, i endehononku.
 3.  Domu ma tu silangMi, i ma tioponku. Asa unang lilu au, Ho ihuthononku. SilangMi Tuhanki......!
12.  Renungan paopathon: “MARGURU TU ROHAM DO”
L:    Dung sahat di porlak Getsemane. Didok ma tu angka sisean i: “Hundul ma hamu jolo dison saleleng disan Ahu martangiang”. Ditogihon ma si Petrus, Jakobus dohot si Johannes. Marsak situtu ma Jesus bobonosan, didok: “Mansai marsak situtu do rohangKu, hira na mate do. Dison ma hamu dungo rap dohot Ahu”. Dung i laho ma Ibana saotik tu jolo, dipatungkap ma bohiNa martangiang: Ale Amang, molo tarbahen, salpuhon ma siinumon on sian Ahu! Alai tahe, unang marguru tu rohangKu, rohaM do!  Dung i mulak ma Ibana tu siseanNa na tolu i, hape tarpodom do nasida. Didok ma tu si Petrus: Ndang margogo hape hamu dungo rap dohot Ahu nanggo sangombas? Dungo ma hamu jala martangiang asa unang hamu bongot tu pangunjunan, ai na girgir do nian tondi i alai gale do ia daging.
H:    Dung i laho ma Ibana paduahalihon martangiang, ninna ma: Ale Amang, molo so tarbahen salpu on, nda ingkon Huinum, sai saut ma lomo ni rohaM! Alai di na ro i Ibana, tarpodom dope nasida didapot, ai mansai dokdok do salibonnasida. Gabe ditadingkon ma laho martangiang patoluhalihon mandok hata ondeng.
L:    Dung i didapothon ma muse angka siseanNa, didok ma: Datdatanmuna dope modom dohot maradian? Nunga dapot tingkina, sahat ma Anak ni Jolma i tu tangan ni pardosa. Hehe ma hamu! Laho ma hamu! Ndi, nunga ro na pasahathon Ahu.
H:    Diboto si Judas siparjehe i do inganan i, jotjot do marpungu Jesus disi dohot siseanNa. Anggo si Judas diarahon ma angka soldadu dohot naposo ni sintua ni malim, mantat sulusulu dohot sinjata. Diboto Jesus do luhut na naeng masa i. Ruar ma Ibana, mandok: Ise do na jinalahanmuna i? Ninna nasida ma: Jesus halak Nazaret i do!
L:    Dung i ninna Jesus ma tu nasida: Ahu do i! Dung didok songon i, sumurut ma nasida martinggangan tu tano. Diulahi Jesus ma manungkun: Ise do na niluluanmuna? Didok nasida ma: Jesus halak Nazaret i do! Gabe ninna Jesus ma: Nunga hupaboa tu hamu “Ahu do i”, asa molo Ahu do na ni luluanmuna, loas ma laho angka on, ai naeng do jumpang na nidokNa i: Ndang adong na mago Hubahen agia sada sian angka na nilehonMi tu Ahu.
H:    Nunga dipabotohon parjehe i hian partinandaan, didok: Ia I na huumma, Ibana ma i, i ma tangkup hamu! Didapothon si Judas ma Jesus, didok: Tabi di Ho, Guru! Laos diumma. Alai ninna Jesus ma: Marhua ho tuson, anggia? O Judas, pangummaon do hape dibahen ho pasahathon Anak ni jolma i! Ditangkup ma Jesus.
L:    Marnida i, sahalak sisean i pintor manintak podangna, ditampul-hon ma tu sahalak naposo ni sintua ni malim i, gabe dipisikhon ma pinggolna; alai dipinsang Jesus ma: pasarung podangmi, na  manintak podang, mago ma bahenon ni podang! Ai na so tarbahen Ahu di roham mangido sian Damang, asa dipadiri saonari lobi sian 12 loksa surusuruan? Alai songon dia ma disi saut hata ni surat i na mandok: Ingkon masa do na songon i? Uju i ma didok Jesus tu natorop i: Hira dompak panamun do hamu hehe. Na ro do hamu marpodang jala maniop lombu-lombu laho manangkup Ahu. Ari-ari do Ahu hundul mangajari di Bagas Joro, hape so ditangkup hamu au disi.
S:    Alai na masa do sudena on, asa jumpang hata ni angka panurirang. Dung i ditadingkon saluhut sisean i ma Ibana laho maporus.
14. Marende No. 182: 1 -  2 “Tu JoloM, O Debatangku”
1.    Tu joloM, O Debatangku! Sai use do rohangkon. Sai pasiat tangiangku dohot iluilungkon.
2.    Husolsoli do rohangku na gok dosa i tongtong. Ai godang ariaringku na hubahen ambolong.
15. JAMITA:
16. Marende No. 213:1-... “Dung Sonang rohangku”
(Laos pasahathon pelean tu Huria)
1.    Dung sonang rohangku dibaen Jesus i porsuk pe hutaon dison, napos do rohangku di Tuhanta i dipasonang tongtong rohangkon. Sonang do, sonang do, dipasonang tongtong rohangkon.
2.    Diporsan Tuhanku sandok dosangki, bolong tu na dao do dibaen. Nang sada na so jujuronNa be i. Na martua tondingku nuaeng. Sonang do.....!
3.    Mangolu nang mate di Jesus do au. Ibana haporusanki, hataNa sambing do partogi di au. Ai na tau haposanku do i. Sonang do......!
                             ~~~~~~ Jongjong ma hita saluhutna~~~~~~
17. Refleksi: TAHANGOLUHON MA SITAONON NI JESUS:
L;    Nunga tapatupa di borngin on partangiangan Passion na parjolo na manogu rohanta manghangoluhon sitaonon ni Tuhan Jesus. Songon tanda ni naung tabereng induk ni haporseaon i, i ma: Tuhanta Jesus na manaonhon parsilangon i, dia ma dohononta tu Ibana?
H:    Pinuji ma Debata Ama ni Tuhanta Jesus Kristus, naung umpasu-pasuhon tu hita ragam ni pasupasu partondion sian banua ginjang dibagasan Kristus.
L:    Jolma pardosa do hita, alai na badia do ianggo Tuhanta Jesus na manaon hamatean, upa tinuhor ni dosanta. Tutu ma tapaingot-ingot Ibana na tarpajal di silang i, unang marnaloja hita jala unang mandate tondinta. Nuaeng marpadan ma hita tu adopanNa nabadia i marhite na rap hita mangendehon:
S:    Mangendehon No. 88: 2: “Disurgo do alealenta”
       Tarsolsol bagi do rohangku paidaida dangolMi. Marningot sasude dosangku, ai i do na tinaonMi. Hupuji nasa asiMi, alai gumodang holongMi.
18.  Tangiang Pelean – Ale Amanami – Pasupasu –
Amen 3X diendehon.

Tidak ada komentar:

Posting Komentar