Sabtu, 07 Mei 2011

Acara Parpunguan Taon Baru

Acara Parpunguan Taon Baru
Di HKBP Sukajadi Resort Sukajadi Distrik XXII Riau – Pekanbaru
Kamis, Tgl. 01 Januari 2011

Marlas ni roha jala marolopolop dibagasan Jahowa!

01. Prosesi Parhalado HKBP Sukajadi (Jongjong ma sude Parhalado di langgatan pasahathon Selamat Taon baru tu sude ruas ni Huria HKBP Sukajadi – Diiringi orgel)      
02. Salam Selamat Taon Baru:
(Ket: Pdt=Pandita; Ph=Parhalado; A= Ama; I= Ina; RN= Remaja/ Naposo; H=Huria; S= Sude):
Pdt:   Asi ni roha dohot dame sian Debata Amanta dohot sian Tuhan Jesus Kristus ma mandongani hamu di taon na imbaru on.
H :     Asi ni roha dohot dame ni Debata ma nang di hamu.
Ph:    Selamat Taon Baru ma di hamu, didongani Debata ma hamu manjangkon Taon na Imbaru on.
H :     Selamat Taon Baru ma nang di hamu, didongani Debata ma nang hamu manjangkon taon na imbaru on, huhut manguluhon HuriaNa.
Ph:    Mandok mauliate ma hamu tu Jahowa ai Pardengganbasa do Ibana, ai ro disalelenglelengna do asi ni rohaNa.
H :     Jahowa do donganku, ndang tagamon mabiar ahu, tung aha ma tagamon bahenon ni jolma tu ahu? Dengganan marhaporusan tu Jahowa, asa marhaposan tu jolma. Dengganan mar-haporusan tu Jahowa asa marhaposan  tu angka raja. Jahowa do pargogongku dohot endengku, jadi gabe hatuaongku Ibana.
Pdt:   Sai tu Jahowa ma pasahat parsorionmi, jadi Ibana ma pangoluhon ho, ndang tagamon loasonNa partigor i humasusa ro di saleleng-lelengna. Antong hamuna angka dongan! Gabe marurat jala pinauliuli ma hamu di bagasan Ibana, togu marhaporseaon, hombar tu na niajarhon tu hamuna; lumobi ma marroha mauliate. Sian nasa rohanta, tasomba ma Tuhanta Pardenggan basa i, marhite na taendehon: Naung salpu taon na buruk i, Ho ma hupuji Tuhanki......!
03. Marende BE No. 70 : 1 – 2 “Naung Salpu Taon Na Buruk i”
1.   Naung salpu taon na buruk i. Ho ma hupuji Tuhanki, ai diramoti Ho tongtong, tondingku dohot dagingkon, ai diramoti Ho tongtong, tondingku dohot dagingkon. Jongjong
2.   O Jesus sai asi rohaM, paian denggan ni basaM, muse ditaon na’mbaru on, di nasa HuriaM tongtong, muse ditaon na’mbaru on, di nasa HuriaM tongtong, 
04. Votum – Introitus – Tangiang :
L:   Marhitehite goar ni Debata Ama, AnakNa Tuhan Jesus Kristus dohot Tondi Parbadia na manompa langit dohot tano on. Amen. Sai mangaranapi do matangku dompak dolok, sian dia do ulaning ro pangurupion tu ahu? Sian Jahowa Sitompa langit dohot tano on sambing ro pangurupion ianggo tu ahu.
H:  Ndang tagamon loasonNa tarsulandit patmu, ndang tagamon nok mata ni Sijaga ho.
L:   Sai jagaon ni Jahowa do ho sian nasa parmaraan, sai jagaonNa do tondim. Sai jagaon ni Jahowa do ho lao ruar dohot laho bongot olat ni on ro di saleleng ni lelengna. Taendehon ma Haleluya!
S:   Mangendehon: Haleluya, haleluya, haleluya.
L:   Martangiang ma hita: Ale Tuhan Debata, sian asi ni rohaM do umbahen sahat hami tu taon na imbaru on. Ho do na manga-ramoti hami di taon 2010 naung salpu i. Sai asi ma rohaM, sai unang tulak hami nuaeng, sai dongani ma hami mandalani ari-ari ni ngolunami di 2011 on.
H:  Pasu-pasu ma hami ro di angka ulaon na denggan na huula hami marhitehite goarMu. Alai na gumodang, pasupasuhon ma HataM Nabadia i tu rohanami, asa gabe imbaru rohanami, jala asa tar-pamasuk Ho hami tu banuaginjang di hasusuda ni bohalnami. Amen. Hundul ma hita saluhutna
05. Koor:
06. Marende No. 68 : 2 + 5  “Masilelean Angka Taon”   
2.   Diudut Ho do hosangki, paidaida ahu. Manang adong parbue ni na niulaM di ahu. Hape jotjot tarhirim Ho, parbue i ndang olo ro.
5.   O Jesus sai urupi au, di taon na ro mamboan parbue, angka na sai tau, padaohon hamagoan, sai pargogoi ma au tongtong, pasangap Ho di ngolungkon.
07. Patik ni Debata: Poda 3: 3 - 6
L:   Tajaha jala tabege ma Patik ni Debata di Parpunguan taon baru sadari on, i ma na tarsurat di Poda 3: 3 - 6, na mandok: Sai unang ma tallushon sian roham habasaon dohot hasintongan,  horunghorungkon tagonan angka i tu rungkungmu, jala surathon angka i bahen parningotan ni roham.
H:  Jadi dapotan asi ni roha dohot pangantusion na denggan ho maradophon Debata dohot jolma.
L:   Marhaposan tu Jahowa ma ho sian nasa roham, jala unang marpangunsandean ho tu pingkiranmu sandiri.
S:   Sai Ibana ma tanda di nasa dalanmu, asa Ibana patigor angka dalanmu.
L:   Rap ma hita mangido gogo sian Tuhan Debata laho mangulahonsa.
S:   Ale Tuhan Debata! Sai pargogoi ma hami mangulahon na hombar tu PatikMi. Amen.
08. Koor:
09. Marende No. 64: 2 + 4 “ Naung moru do muse”
2.   Aut alusanku Debatangku, ra tung maila au disi. Marningot salpu ni rohangku, ro di sude ulaonki. Ai dosa do binaen ni tangan, gok dosa nang rohangku pe. Nang pat nang mata nang pamangan, luhut marsala do hape. Jongjong
4.   Ndang dapot bilanganku dosa, naung huulahon nasailaon. Huhut ndang hurajumi basa ni Tuhan Jesus nasailaon. Ndang dibaloshon Ho Tuhanku, tu au hombar tu dosangki. Sai dipalambas Ho rohaMu, marnida pangalahongki.
10. Tangiang Manopoti Dosa – bagabaga ni Debata:
L:   Ale Tuhan Debata Parasiroha na sumurung. Na marsalpuan do angka ariarinami, alai na hot ro di salelenglelengna do asi ni rohaM. Gok dosa dohot pangalaosion do ngolunami siganup ari. Jotjot do hulaosi hami PatikMu di bagasan taon na salpu i. Asi ma rohaM salpuhon ma dosa pangalaosionnami hombar tu denggan ni basaM. Pauba jala paimbaru ma roha dohot pambahenannami, asa tutu situtu hami rap dohot Ho mangolu.
H:  Molo huingot hami do saluhut dosanami di taon na salpu i, ndang tagamon be hami manjangkon taon na imbaru on. Mansai godang do ari-ari ni ngolunami manimbil sian angka dalanMu. Asi ni rohaM sambing do na patauhon hami tolhas tu taon na imbaru on. Dongani jala pargogoi ma hami manundalhon dosa dohot pangalaosionnami di taon 2011 on. Asi ma rohaM di hami, sai sesa ma dosasami.
S:   Mangendehon No. 70: 4 “O Jesus Sipangolu au”   
      Sai unang jujur dosa i, binaen di taon na salpu i :;: Urasi hami sasude, Asi rohaM di hami be:;:
L:   Umbalga do denggan basa dohot asi ni rohaM tumimbangkon pangalaosionnami. Umbalga do holong ni rohaM tumimbangkon angka dosanami. Asi ma rohaM ale Jahowa, palua ma hami sian uhum dohot hamatean, asa mangolu hami dibagasan Ho. Sai unang baloshon tu hami hombar tu angka hajahatonnami.
S:   Mangendehon No. 70: 6 “O Jesus Sipangolu au”  
      Lam jonok taiti hami on tu hangoluan na tongtong :;: Pahot ma di HuriaMi jambarna na sumurung i :;;
L:   Hamuna angka dongan! Tajangkon jala tahangoluhon ma bagabaga ni Debata taringot tu hasesaan ni dosanta. Parasiroha jala Pardengganbasa do Jahowa, lambat tarrimas jala Parasiroha godang. Ndang dibahen tu hita hombar tu angka dosanta, jala ndang dibaloshon tu hita hombar tu angka hajahatonta. Songon asi ni roha ni amana mida angka anakna, asi ni roha ni Jahowa di angka na manghabiari Ibana. Hasangapon ma di Debata na di banua ginjang.
S:   Amen.  Hundul ma hita saluhutna
11. Marende No.190 : 1 – 2  “Las Rohangku Situtu”   
1.   Las rohangku situtu, mida Jesus na lulu. Manjalahi hajolmaon, ai Ibana paluahon. Jolma manisia i, sian hamagoan i.
2.   Las rohangku situtu, mida Jesus na burju. Patupahon hangoluan, di au na di hamagoan. Tung saluhut dosangki, do disesa Jesus i.
12. Koor:
13. Epistel: Psalm 121: 1 - 8
  L:      Hamuna angka dongan! Tajaha ma Hata ni Debata, turpuk Epistel di Parpunguan Taon Baru sadari on, i ma na tarsurat di Psalm 121: 1 - 8, na mandok: Ende hananangkok. Sai mangaranapi do matangku dompak angka dolok: Sian dia do ulaning ro pangurupion tu ahu?
Ama:  Sian Jahowa Sitompa langit dohot tano on sambing ro pangurupion ianggo tu ahu.
Ina:    Ndang tagamon loasonna tarsulandit patmu, ndang tagamon nok mata ni Sijaga ho.
L:       Ida ma, ndang olo nok mata, jala ndang olo modom ianggo Sijaga Israel.
RN:    Jahowa do Sijaga ho, Jahowa do parlinggomanmu di lambung ni tanganmu siamun.
L:       Ndang tagamon doiton ni mata ni ari ho arian, manang bulan pe bornginna i.
H:      Sai jagaon ni Jahowa do ho sian nasa parmaraan, sai jagaonna do tondim.
S:       Sai jagaon ni Jahowa do ho laho ruar dohot laho bongot, olat ni on ro di salelenglelengna.
     L:       Martua do na manjaha dohot na tumangihon Hata ni Debata.
 S:       Amen!
14. Koor:  
15. Marende No. 66 : 1+3 “Debata Baen Donganmi”
1.   Debata baen donganmi, lao mangula ulaonmu. Baen Ibana haposanmu. Sai paserep rohami. Debata baen donganmi, Debata baen donganmi. Jongjong ma hita saluhutna
3.   Debata baen donganmi, sai na saut do ulaonmu. Sai na tulus do sangkapmu, jala sonang rohami. Debata baen donganmi, Debata baen donganmi.
16. Manghatindangkon Haporseaon:
       L:  Hamuna angka dongan! Tahatindanghon ma haporseaonta i rap dohot donganta sahaporseaon di sandok portibi on, rap ma hita mandok:                    
S:   Ahu porsea........! Hundul.
17. Koor:
18. Tingting/Sunggul-sunggul:
19. Acara mandok Hata:
1.   Mewakili utusan ni ruas ni HKBP Sukajadi.
2.   Mewakili utusan ni Parhalado HKBP Sukajadi.
3. Martangiang sian utusan ni Ruas ni HKBP Sukajadi.
20. Marende No. 65: 1-…“Majumpang taon imbaru”  (Pel Ia Ib 
1.   Majumpang taon imbaru on di au di bahen Jesus. Dibaen rohaNa di au on, basaNa dipatulus. Ibana do manogu au, saluhut jea dipadao. Mambaen las ni rohangku.
2.   Dibahen i hupuji Ho, o Jesus Debatangku.  Ai ndang hea mangulon Ho mambaen partuaonku. Rohangku panuratan ni godang ni denggan basaMi. Ai Ho do pangurupi.
3.   I pe dohot tu jolo on, Ho pangasahononhon. Marjea pe portibi on, martua au dohonon. Ai las rohangku marsak pe, mangolu au, lao mate pe. Ho do hatuaonku.
23. Jamita: Jesaya 61: 10a-b (Pinarade ni Ompui Ephorus HKBP Pdt. DR. Bonar Napitupulu).
24. Marende No. 69:1, 3 –4 “Jesus sai urupi hami”  (Pelean II)
1.   Jesus sai urupi hami dohot di taon baru on. Paimbaru gogonami mangihuthon Ho tongtong. Pasu-pasu ma muse na porsea sasude.
3.   Taon parasinirohaon, baen di au sandok taon on. Lam pahot ma hasesaan ni dosangku di au on. Holan Ho do Jesuski, tuk pasaehon dosangki.
4.   Sai apuli ma rohangku dohot holong ni rohaM. Jala jalo tangiangku ala denggan ni basaM. Jea sasude padao, asa unang marsak au.
25. Manghangoluhon Hata Ni Debata Mamolus Taon Na Imbaru :
L:   Nunga sahat hita tu taon na imbaru di taon 2011 on. Lam tamba taon, lam jonok do hita tu ujung ni saluhut. Marragam do pangalaho dohot parrohaon na ingkon adopanta. Alai mar-donganhon Debata sai hamonangan do jambarta gabe malua do hita sian saluhutna i. Ibana do pataruhon hita,  jala patuduhon dalan sidalananta di taon na 2011 on, asa tongtong las rohanta mangolu rap dohot Ibana.
S:   Mangendehon No.268:1 “Debatangku Do Donganku”  
    Debatangku do donganku, ganup ari ganup taon. TumpahanNa do langkangku urupanNa au manaon. Pos do rohangki disi, Debata do donganki salelenglelengna i.
L:   Na mubauba do angka na di hasiangan on. Alai dilului rohanta do na hot na so olo muba i, i ma Kristus Tuhan i. Tinggil ma hita manangihon Hata ni Debata ganup ari, marhite na ringgas hita mangulahonsa. Borhat ma hita mandalani ngolu na imbaru di taon 2011 on, dibagasan hadameon dohot las ni roha. Nunga dipadiri Tuhan Jesus hita laho marparbue. On do pinangido ni Hata ni Debata sian hita sadari on: “Marlas ni roha jala marolopolop ma hita dibagasan Jahowa”.
S:   Mangendehon BE No. 811: 1 + 4 “Di au ma Ho Tuhan” 
1.   Diau ma Ho Tuhan di ariaringki, ai denggan ni basaM padame rohangki.
     Ref.   Di sude partingkian, di sude inganan di au ma Ho O Tuhan asi rohaM.
4. Diau ma Ho Tuhan di ariaringki, baen ma au nampunaM, pinasupasuMi. Disude partingkian.......!
26. Tangiang: Pelean – Taon Baru – Ale Amanami -  Pasu-Pasu!

Parhalado HKBP Sukajadi
Pasahathon
Selamat Taon Baru, 01 Januari 2011 

Tidak ada komentar:

Posting Komentar