Minggu, 08 Mei 2011

Acara Parmingguon Manjalo Tohonan Sintua – Pensiun sian Hasintuaon

“Mangulahon Ngolu Na Gabe Sitiruon”
I.  Parmingguon:
01. Prosesi: Dung martangiang Parhalado di Konsistori mardalan ma prosesi. Dung masuk prosesi tu Gareja, jongjong ma sude ruas ni Huria laos dipalu ma giring-giring. Dung hundul saluhutna martangiang ma hita dibagasan rohanta be. Diiringi Song Leader mangendehon No. 395: 1” Masuk ma ho” (Satonga soara)
       Masuk ma ho, na gogot do harbangan, masuk ma ho, sompit do dalan i. Jesus manjou nang ho diparjalangan, sai ro ma ho naeng sonang rohami. Jesus manjou ho, bege ma i. Unang be togang oloi joujouNa i. Unang be togang, oloi joujouNa i.
02.  Joujou tu Parsaoran Nabadia:
L:    Hamuna angka dongan sahaporseaon! Sadari on Minggu padua-puluhon dung Trinitatis, tapatupa do parmingguon pasahathon Tohonan Hasintuaon tu angka donganta naung tapillit sian tonga-tonganta. Songon i dohot pasahathon pensiun sian hasintuaon tu Parhalado ni Hurianta HKBP Sukajadi on ala naung gok umurnasida 65 taon hombar tu Aturan Peraturan ni Hurianta HKBP. Sai diurupi jala dipargogoi Debata ma hita pasangaphon Ibana marhite parmingguonta sadari on. Dipahot Tuhanta i ma di hita hadameon, holong nang las ni roha pe. Antong! Tapahohom ma rohanta manombahon pujipujianta tu Debata Pardenggan basa i. Taendehon ma: “Haleluya ari Minggu, ari na dumenggan i.....”
S:    Mangendehon No. 27: 1 + 5  “Debata do manggomgomi”
1.     Haleluya ari Minggu, ari na dumenggan i. Molo iba lao marpungu dohot dongan Kristen i. Ari na dumenggan i, las ni rohangki do i. .........Jongjong ma hita saluhutna…………
5.     Sai pahehe ma rohangku sai ajari ma au on. Jala tongos pangapulMu tu bagasan rohangkon. Baen sombu sadari on, uas ni tondingkinon.
03.  Votum–Introitus – Tangiang: (L= Liturgis; H = Huria; S: Sude)                                                                                                                                            
L:    Marhitehite Goar ni Debata Ama, AnakNa Tuhan Jesus Kristus, dohot Tondi Porbadia, na tumompa langit dohot tano on. Amen. Biar mida Jahowa do parmulaan ni hapistaran, maruli hamaloon ni roha na sumurung do sude angka na mangulahonsa; hot do baritana i ro di salelenglelengna.
       H:    Laos Ibana do na mangalehon deba gabe Apostel, deba Panurirang, deba evanggelist, deba muse Parmahan jala Pangajari; Patureturehon angka na badia i, laho mangulahon tohonan i, pauliulihon Daging ni Kristus.
       L:    Paima sahat hita saluhut tu hasadaon ni haporseaon nang parbinotoan di Anak ni Debata, gabe jolma na tang jala matoras situtu, mangihuthon hagogok ni rimpas ni Kristus. Asa unang be hita dakdanak, angka na pinalindaklindak jala na pinamboanboan ni pangombus ni ragam ni poda, binahen ni pangaliluhon ni jolma dohot angkal na paotootohon.
       H:    Gabe parhasintongan hita tahe dibagasan haholongon i, jala lam magodang ma hita di na saluhut, mangeahi Ibana, Ulu i, i ma Kristus.
       L:    Sian Ibana do sandok daging i dipadomu jala martomu, tiniop ni sude uraturat pangurupi, gabe lam magodang daging i mangihuthon pangulaon ni ganup ruas di bagianna be, pinauliuli di bagasan haholongon i. Taendehon ma Haleluya.
S:    Mangendehon: Haleluya – Haleluya - Haleluya.
L:    Martangiang ma hita: Ale Tuhan Debata, Pargogo na so hatudosan, na tumompa langit dohot tano dohot nasa isina. Hinorhon ni asi ni rohaM do umbahen tarbahen hami marpungu, marlas ni roha di tonga-tonga ni HuriaM sadari on manghalashon pangaramotionMu di hami patupa Pasahathon Tohonan Sintua di HuriaM, dohot pensiun sian hasintuaon dongannami naung mangula na saleleleng on di huriaM HKBP Sukajadi on.
H:    Hupangido hami ma tu Ho: Sai lehon ma tu huriaM. TondiM na badia i dohot hamaloon sian Ho  asa lam rarat jala lam ganda harajaonMu di tongatonga ni portibi on.
L:    Sai lehon hiras  ni roha tu naposoM manghatahon hataM asa lam tu dengganna HuriaM marhite sian i. Pargogoi ma hami mangoloi Ho dibagasan haporseaon na manongtong asa manahan hami sahat ro di ujungna, marhite AnakMu Jesus Kristus Tuhannami.
S:    Amen.  Hundul ma hita saluhutna.
04. Marende  No. 116: 2 - 3 “Ditompa Ho do au“
2.     Tuhan Sihophop au, sai buri tondingkon. Marhite mudarMi torusi ngolungkon. Pinuji ma goarMu, arga ma pangkophopMu. Dibaen pangalahongku, nang nasa ulaonku. O Jesus Sipalua au tu Ho ma au patau.
3.     Tu TondiMi Tuhan hulehon diringkon. Sai tong ma dirajai sandok pamatangkon. Ibana hutangihon, sai saut au ditogihon. Tu ngolu partondion, manahan di ujian. O Tondi Parbadia i sai Ho ma Rajangki.
05.      Patik: 1 Timoteus 3: 1 – 7.
  L:    Hamuna angka dongan sahaporseaon! Tatangihon jala tahangoluhon ma Patik ni Debata di minggunta sadari on, i ma na marpardomuan tu ulaon ni Sintua na tarsurat di 1 Tim 3: 1 - 7, na mandok: Hata haposan do on: Ulaon na denggan do pinangido ni na mangalului hasintuaon. Dibahen i, unang ma adong dapot sisurahan di sintua: Harajaan ni sada boruboru ma ibana, marpangontik, marroha, marhapantunon, na las roha martamue, na malo mangajari.
H:    Unang ma sisobur tuak, unang pangalinsingi; alai na lambok, pardame jala so impolan di perak.
L:    Na malo mangarajai donganna sabagas, paranakkon sioloi ajar mardongan sandok hahormaton. Ai molo so diboto mangarajai isi ni bagasna, tung songon dia ma paturetureonna huria ni Debata?
H:    Unang ma halak na imbaru masuk, unang gabe ginjang rohana; jala madabu maon tubagasan uhum ni sibolis i.
       L:    Ingkon denggan do baritana di halak na di balian, asa unang ibana madabu tubagasan panginsahion dohot sambil ni sibolis i. Antong rap mangido gogo ma hita  tu Debata laho mangulahonsa.
       S:    Ale Tuhan Debata, sai pargogoi ma hami mangulahon na hombar tu patikMi. Amen.
06.  Marende No. 171: 1 - 2 “Tandai ma au” Bl. 49
1.     Tandai ma au, sungkapi ma dohot rohangku. Uji ma au. Pamanat huhut ma dalanku. Olo di tanda Ho au Debata. Jongjong
2.     Asi ma rohaM, taringot tu pangalahongku. Olo, tutu, jotjot do na lilu dalanku. Sesa dosangku sude Debata.
07.  Manopoti Dosa dohot manjangkon baga-baga ni Debata:
       L:    Hamuna angka dongan nahinaholongan ni Tuhan Jesus Raja ni Huria i. Najongjong do hita nuaeng di adopan ni Debata na mamereng torus tu bagasan rohanta be. Ala ni tapaunduk jala tapaserep ma rohanta laho manopoti dosanta. Martangiang ma hita: Ale Tuhan Debata, Amanami na di banua ginjang, Pargogo na so hatudosan, Pardenggan basa do Ho, jala ro di saleleng-lelengna do asi ni rohaM. Sai marpamuati ma rohaM di hajahaton-nami, jala sai unang be ingot angka dosanami. Ai jotjot do hami mardosa maradophon Ho, jala jotjot do husungguli hami rimasMu marhite sian pangalaosionnami di hataM nabadia i. Ale Tuhan Jahowa, sai unang paingotingot pangalaosionnami, unang alang asi ni rohaM. Sai urupi ma hami, Ho ale Tuhan Debata  hatuaon-nami, palua hami jala sesa dosanami, marhite anakMu Jesus Kristus Tuhannami.
       H:    (Martangiang dibagasan roha + 2 Minut (Diiringi orgel dohot Song Leader mangendehon No. 162: 1 + 7 (Satonga soara)
1.     O Debata mansai balga huhut dokdok dosangku. Na so adong di tano on, na tau haporusanku.
7.  Tu asiMi ma rohangki, sai sesa ma dosangku. Tu lambungMi ma tondingki, dung tos muse hosangku.  
       L:    Hamuna angka dongan! Nunga tapangidohon tu Debata hasesaan ni dosanta. Nuaeng pe, tajangkon jala tahangoluhon ma bagabaga ni Debata taringot tu hasesaan ni dosanta: “Songon on do  Hata ni Jahowa: Unang ho mabiar, ai Ahu do siluluhon ho, nunga pola Hujou goarmu, Ahu nampuna ho”. Hasangapon ma di Debata na di banua ginjang.
       S:    Amen. Hundul ma hita saluhutna
08. Marende No. 443: 2 - 3 “Dung Tuhan Jesus”
2. Di Ho ngolungku las rohangki, jumolo Jesus Siluami. PangiringonMu tolongMu i, mangalo dosa, nang rohangki. Tabaritahon holongNa i, Didia Tuhan tudoshon i, tuk manumpahi, tarlobi da. Sasada Jesus pinuji ma.
3.  Hibul ma ahu Jesus di Ho, sonang rohangku, tarapul do. Mian di ahu ma baen hataMi, paima das au tu lambungMi. Tabaritahon .....!
09. Epistel: 1 Raja-raja 2: 1 - 4
      L:      Hamuna angka dongan! Tajaha jala tatangihon ma Hata ni Debata turpuk Epistel di Minggu sadari on na tarsurat di 1 Raja-raja 2: 1 – 4 , na mandok: Jadi dung lam jonok ajal ni si Daud laho mate, martona ma ibana tu anakna si Salomo, ninna ma:
     H:      Na laho ma anggo ahu tumopot dalan ni saluhut manisia isi ni tano on. Antong marsihohot ma roham jala pir tondim.
     L:       Jala radoti pangoloion tu Jahowa Debatam, asa marparange ho di angka dalanNa laho mangaradoti angka patikNa, angka tonaNa, angka uhumNa dohot angka panindangionNa, hombar tu na tarsurat dibagasan patik ni si Musa, asa marbisuk ho di sude sibahenonmu dohot di sude na tinembak ni roham disi.
     S:       Asa dipahot Jahowa hataNa, na pinarbagabagaNa tu ahu, uju nidokNa: Molo diramoti angka anakmu angka dalannasida, marparange nasida di jolongKu dibagasan hasintongan sian nasa rohanasida dohot sian nasa ateatenasida, na so tupa tos sian ho baoa na hundul di habangsa ni Israel, ninna.
       L:       Martua do angka na tumangihon Hata ni Debata jala na umpeopsa.
       S:       Amen.
10. Marende No. 471: 2 – 3 “Hupillit Jesus donganki”  Bl. 318   
       2. Arga di tobus tondingki, na mate do Ibana. Ngolungku hubaen upa nii, lao mangoloi hataNa. Di Ho ngolungku ro di ajalhu Jesus di Ho au mate mangolu. Di Ho ngolungku ro di ajalhu. Jesus di Ho au mate mangolu. ....Jongjong ma hita saluhutna......
       3.  Rohangku baen ingananMi patiur ma langkangku. Huhatindanghon ma disi. Ho Jesus Palitongku. Di Ho ngolungku.......!
11.  Manghatindanghon Haporseaon:
         L:   Tahatindanghon ma haporseaonta i songon panghatindanghonon ni donganta sahaporseaon di sandok portibi on. Rap ma hita mandok:
 S:  Ahu porsea..........du...... Hundul ma hita saluhutna
12. TINGTING (WARTA JEMAAT):
13. Marende No. 476: 1.... “Ndada au guru di au be” (Pel IA– IB)
1.     Ndada au guru di au be, Jesus do nampuna au. Las rohangku dung hubege, Jesus Sipangolu au. Ref: Ndang be au guru di au, Jesus na humophop au, nampuna au. Tung saleleng au mangolu, Jesus do nampuna au.
2.     Ndang di au di Tuhan Jesus, daging dohot rohangki, Saluhutna hupasahat tu Ho Jesus Tuhanki. Ndang be au, guru di au......!
  3. Ulaonku nang artangku, pangke ma baen sangapMi. Diusehon Ho mudarMu tung tanda do holongMi. Ndang be au, guru di au.....!
  4.  Naung tarsurat do  goarhu dibaen ho tu tanganMi. Laos hupuji ma goarMu, salelenglelengna i. Ndang be au, guru di au......!        
14. Jamita: Pilipi 3: 17 – 21                                  
15. Marende No. 783: 1, 4..... “Tuhan Sitompa saluhut”  (Pel II)
  1. Tuhan Sitompa saluhut, Ho do na marmulia i, ndang na tarasam saluhut nilehonMi.  
  2. Ditongos Ho do anakMi, laho manobus jolma i, ndang na tarasam asiMi nilehonMi.  
  3. Dilehon Ho do tondiMi, ro di sude na ringkot i, holong, huaso, ngoluMi nilehonMi.  
4.        Ndang na tarbalos burjuMi, disesa Ho do dosa i, togu do panghirimon i nilehonMi.
5.        Salpu do arta tano i, sada do na manongtong i, banua ginjang hot do i nilehonMi.
6.        Luhut peleannami on Ho do haroroan ni i, pelean na jinangkonMon nilehonMi.
II. ACARA PASAHATHON TOHONAN SINTUA:
16.      Marende No. 156: 4 “Jahowa Tuhanki”
(Tingki marende hita, Jongjong ma angka Sintua nanaeng manjalo Tohonan mangadop langgatan dipudina ma keluarga, laos marhaliang ma angka Sintua di langgatan manjangkon Sintua na manjalo Tohonan).
Sai tatap ma dison, O Jesus siseanMu. Najongjong di joloM, mangido lehononMu. Tu ganup tondiMi, nang huasona pe. Manogu bangsoMi, nang mangajari pe.
17.  Manjaha ulaon ni Tohonan Sintua:
  1. Bestur Resort manjahahon ulaon tohonan Sintua:  
       Hamu angka dongan sahuria! Sadari on patupaon ni Hurianta do marhite naposoNa pasahathon Tohonan hasintuaon tu 5 halak nanaeng Parhalado di Hurianta HKBP Sukajadi on, angka on ma goar nasida: (1) CSt. M. Marbun (Wijk VII); (2) CSt. E. P. Nainggolan (Wijk XVIC); (3) CSt. J. Hutagalung (Wijk III); (4) CSt. S. M. Silitonga (Wijk XI); dohot (5) CSt. J. Siahaan (Wijk XVIB).  Nunga jongjong nuaeng nasida dison na itapillit bahen Sintua di tongatonganta. Naeng pangidoonnasida ma pasupasu sian Tuhanta i, asa margogo nasida mangulahon ulaonnasida. Antong! Tabege ma jolo pangarimpunan ni ulaon ni Sintua:
1.     Pangula ni Huria do nasida mamatamatahon dongan angka na pinasahat tu nasida dohot mangaramoti parangenasida. Molo diboto nasida, na hurang ture parange ni manang ise, ingkon pinsangonnasida i, manang paboaonnasida tu Guru dohot tu Pandita, asa dipature.
2.     Mandasdas donganta tu Parmingguan dohot manangkasi alana umbahen na so ro.
3.     Mandasdas anakboru singkola, asa ondop ro.
4.     Maningkir angka na marsahit jala paturehon na ringkot tu nasida dohot na tarpatupasa, alai na rumingkot, pasingothon Hata ni Debata tu nasida dohot tumanginghonsa.
5.     Mangapuli angka na marsak, paturehon angka na dangol dohot na pogos.
6.     Mangapuli angka sipelebegu, angka parugamo na asing dohot angka na lilu, asa dohot marsaulihon hangoluan na pinatupa ni Tuhan Jesus.
7.     Mangurupi paturehon angka guguan dohot ulaon na ringkot tu Harajaon ni Debata.
2. Pandita Resort Pasahathon Tohonan Sintua:
On pe, hamu na hinaholongan, naeng tangkas botoonnami burju ni rohamuna mangaradoti ulaon hasintuaon i. Dibahen i alusi hamu ma na husungkunhon on:
1.     Na olo do hamu mamarangehon parange na tama di jolo ni Debata dohot di jolo ni jolma?
2.     Na olo do hamu manjalo ulaon hasintuaon songon naung dipajojor ondeng tu hamu?
3.     Na olo do hamu mangaradoti sude sian nasa roha dohot sian nasa gogomuna hombar tu Hata ni Debata?
Molo naung sada rohamuna mangoloi jala marpadanhon sudena i di jolo ni Debata dohot di jolo ni donganta sahuria on, dok hamu ma alusmuna.  
       3. Sintua na naeng manjalo Tohonan mangalusi:
            Na olo do ahu. Sai dipargogoi Debata ma ahu mangulahon saluhutna i.
4. Pasahathon Pasupasu:         
Pdt: Antong! Masijalangan ma hita, paboa hot ni padanmuna i jala paboa na olo do hamu mangula ulaon ni Debata rap dohot hami. “Sai diparrohai Tuhan Debata, Ama ni Tuhanta Jesus Kristus ma hamu, marhitehite Tondi Parbadia manghaburjuhon siulaonmuna, na pinasahat tu hamu sadari on, asa marsangap Debata di tongatonga ni HuriaNa i”. Amen.
5.  Sintua na naeng manjalo Tohonan marsinggang laho manjalo pasupasu: (Pandita Resort Pasahathon Pasu-pasu)
6.  Pandita Resort Pasahathon tu Huria, Sintua na manjalo Tohonan:     
     Pdt:    Hamuna dongan sahuria di HKBP Sukajadi on, jangkon hamu ma nasida dibagasan dame. Sude ma hita on manggogo tumangianghon nasida, asa manjadi ulaonnasida i, huhut manghorhon hasangapon ni Tuhanta Jesus Kristus Raja ni Huria i.
7. Panjangkonon ni Huria:
       Hujangkon hami ma tutu nasida gabe Parhalado di Huria ni Tuhanta dibagasan holong dohot dame na sian Tuhanta i.
8.  Martangiang:
     Pdt:    Ale Tuhan Debata Amanami na di banua ginjang! Mauliate ma rohanami tu Ho ala ni asi ni rohaM di angka dongannami on. Sai tambai ma tu rohanasida angka silehonlehon ni Tondi Parbadia, asa lam marroha jala margogo nasida mangaradoti Tohonan na sahat tu nasida sadari on. Asi ma rohaM dohot di sude ruas ni HuriaM on, asa lam hot haporseaonnasida be, jala lam ture parange nasida mangihuthon Ho. Sungguli ma rohanami asa masihaholongan, unang adong sipinsangon di hami, asa lam rarat harajaonMu, jala marmulia goarMu nabadia i. Amen.
18.  Marende No. 140: 3 - 4 “Girgir ma hamu”
       (Ditingki marende hita hundul ma Sintua naung manjalo Tohonan, laos ro ma tu jolo Sintua nanaeng pensiun).
       3. Radoti burju hataNa sude, sai monang hamu baenonNa muse. Ibana do Raja na tong monang i, torop pe aloNa sumurut do i.
     4. Asi ma rohaM, ale Debata. Pasaut ma HataM, tumpahi na ma. Sude naniula ni naposoMi, Sai baen ma martua sude jolma pe.
B. ACARA PENSIUN SIAN HASINTUAON:
19. Manjaha Surat Keputusan tu Sintua na Pensiun:  
  Pdt: Hamuna angka dongan na sahuria! Sadarion patupaonta do pasahathon Surat Keputusan tu Sintua na pensiun sian haparhaladoon di Hurianta HKBP Sukajadi on ala naung gok umur nasida 65 taon hombar tu Aturan-Peraturan ni Hurianta HKBP. Hamuna Sintuanami: (1) St. T. Br. Silitonga (Wijk V); (2) St. T.S. Nababan (Wijk VII); (3) St. S. Hutagaol (Wijk XIII). Sadari on patupaon ni Hurianta ma tutu pensiun sian hasintuaon tu hamuna. Dihilala rohanami do burju dohot ringgas ni rohamuna mangula tohonan hasintuaon i di Huria HKBP Sukajadi on. Diramoti jala dipasu-pasu Debata ma hamu di ari-ari ni ngolumuna, jala dipasupasu Tuhanta ma nang ulaon panghobasion-muna di Huria on manghorhon hasangapon dohot pujipujian di goar ni Debata Parasi roha i. Nuaeng, tabege ma jolo dijahahon Bestur Resort Surat Ketetapan Pensiun sian hasintuaonmuna sadari on.
20.  Bestur Resort Manjaha Surat Ketetapan Pensiun Sintua:
21.  Pandita Resort Pasahathon hata mauliate:
       Pdt: Nunga dibege hamu taringot tu Surat Ketetapan Pensiunmuna sian hasintuaon di HKBP Sukajadi on. Antong, hamauliatehon hamu ma tu Tuhanta Pardenggan basa i sian na sa rohamuna.  
22.  Sintua na pensiun manghamauliatehon:
      Tama situtu do hami mandok mauliate tongtong tu Debata siala hamu ale angka dongan, songon na patut, ai na ganda situtu do haporseaonmuna, laos tamba holong ni roha ni ganup hamu sama hamu (1 Tess 1: 3).
       (Loas manjalo Surat Ketetapan Pensiun, diuduti ma Pasahat Kenang-kenangan, cendra mata sian Huria).
23.  Mandok Hata (Kesan dohot Pesan) Sintua na Pensiun:
24.  Marningot ulaon panghobasion ni Parhalado naung pensiun:
       Pdt: Huria ni Tuhanta, nunga saut tapatupa pensiun sian hasintuaon nuaeng donganta dison. Tama do ojak tu rohanta Hata ni Debata na mandok: “Huelek-elek ma hamu, ale angka dongan, tanda hamu ma angka na manghalojahon hamu, angka na manguluhon hamu marhitehite Tuhan i, ro di angka na paingothon hamu. Sangap situtu ma rajumi hamu nasida mardongan holong ni roha ala ni ulaonnasida; Sai mardame ma hamu sama hamu”. Ingot hamu ma angka na manguluhon hamu, na paboahon Hata ni Debata tu hamu, ujung ni pardalanan nasida ma bereng hamu, jala tiru hamu ma haporseaonnasida” (1 Tess 5: 12 – 13; Heber 13: 7).
H:    I ma tutu! Huingot jala huhangoluhon hami ma Hata ni Debata na niajarhon nasida, manghorhon las ni roha, patoguhon holong ni roha dohot pahothon panghirimon di hami mangulahon lomo ni roha ni Tuhan i. Amen. 
25.  Marende No. 137: 4 “Raphon Tuhan Jesus i”  BL. 164
(Ditingki marende hita mulak ma Sintua na pensiun tu hundulanna, laos  jongjong ma hita saluhutna).
Tuhan, nang tu jolo on tatap hajolmaon. Sai pararat ma tongtong  hata haluaon. Tu na so tumanda Ho dohot Tuhan Jesus. Asa sasudena ro mandapothon Kristus.
26. Tangiang Pelean- Ale Amanami- Pasupasu –
Amen 3 X diendehon
II. Acara Resepsi dilanjuthon di Aula HKBP Sukajadi
Doc: Gr. Letare Hutabarat/HKBP Sukajadi

Acara Parmingguon
Manjalo Tohonan Sintua
Dohot
Pensiun sian Hasintuaon
Di HKBP Sukajadi Resort Sukajadi

Distrik XXII Riau – Pekanbaru

Tidak ada komentar:

Posting Komentar