Sabtu, 07 Mei 2011

Acara Parmingguon Manghatindanghon Haporseaon – Ulaon Nabadia

Acara Parmingguon   
Manghatindanghon Haporseaon – Ulaon Nabadia
Di HKBP  Sukajadi Resort Sukajadi
Distrik XXII Riau - Pekanbaru
Minggu Misericordias Domini, Tgl. 08 Mei 2011
 
Tuhan Jesus do Parmahan Nadenggan di hita!
01.  Ende Pamujion No. 11: 1 + 5 “Aha ma endehononku”
     Aha ma endehononku, asa pujionku Ho, Ale Tuhan Debatangku, sai urupi au gogo. Ai ndang tarpatupa ahu asi ni rohaM di ahu. Ala ni hupuji Ho tung marribu hali do. ~~~Jongjong ma hita~~~ 
    Sai patogu ma rohangku pasangaphon goarMi. Dohot haporseaonKu asa tu gandana i. Sai pamasuk ale Tuhan, tondingki tu hangoluan. Mangendehon sangapMi salelenglelengnai. 
02.  VOTUM – INTROITUS – TANGIANG:
L:     Marhitehite goar ni Debata Ama, AnakNa Tuhan Jesus Kristus dohot Tondi Parbadia na manompa langit dohot tano on. Amen. Gok Asi ni roha ni Jahowa do tano on. Marhitehite Hata ni Jahowa do manjadi angka langit. Marolopolop ma hamu, ale angka partigor, mangasa-hon Jahowa, talup do marende angka na unjur marroha.
H:    Jongjong di atas suru-suruan Serapim, jala masijouan ma nasida songon on: Nabadia, Nabadia, Nabadia do Jahowa Sebaot, gok hamuliaonNa liat portibi on.
L:     Idama sai nolnol do mata ni Jahowa tu angka na manghabiari Ibana, angka na manghalungunhon asi ni rohaNa.
H:    Sai dihalungunhon rohanami do Jahowa, Ibana do Panumpahi dohot lombu-lombunami. Ai mangasahon Ibana marlas ni roha do hami, marhaposan tu goarNa Nabadia i do hami. Sai pasonggop ma tu hami Asi ni rohaM ale Jahowa, hombar tu panghalungunhononnami di Ho.
L:    Pinuji ma Debata, Ama ni Tuhanta Jesus Kristus, naung umpasu-pasuhon tu hita ragam ni pasupasu partondion sian banua ginjang di bagasan Kristus. Dibolati do hita gabe anak tu Ibana bahen pamujian di hamuliaon ni asi ni rohaNa. Ale Jahowa, sigomgom hami, mansai sangap do goarMu di liat portibi on. Puji Tuhan Haleluya.
S:    Mangendehon: Puji Tuhan Halleluya 3x Halleluya, halelya.  
L:     Martangiang ma hita: Ale Debata Sitolu sada, Debata Ama, Anak dohot Tondi Parbadia! Na mandok mauliate do hami tu Ho, ala ditompa, dipalua jala diparbadiai Ho hami hinorhon ni asi dohot holong ni rohaM na godang i.
H:    Sai ramoti ma hami di bagasan parmaraan dohot pangunjunan, apuli hami uju marsak, pahehe uju tinggang jala togutogu hami di hasusuda ni bohalnami tu harajaonMu na di banua ginjang i, asa disi pujionnami Ho marhite roha dohot hata na imbaru.
L:    Sai urupi ma hami, asa unang mandele uju ro hapogoson tu hami, jala asa unang magopo hubahen hami silehonlehon na denggan i, uju dilehon Ho pasupasuMi tu hami.
S:    Lehon ma di hami haporseaon asa dohot hami parjambar di siteanon ni angka na porsea di Ho marhitehite Jesus Kristus Tuhannami. Amen. ~~~Hundul ma hita~~~
03. Marende No: 467: 1 + 4  “Asi ni rohaM hupuji”
1.   Asi ni rohaM hupuji, ala Ho manobus au. Dipaias Ho rohangku gabe soranganMu au. Ref: IngananMu rohanami tondiMi manggohi i, pangke dohot ngolunami gabe ulaulaMi.
4.   Sai papulik rohanami gabe pangoloi di Ho. Asa marsahala hami lao manghatindanghon Ho. IngananMu rohanami.......!
L:   Patik ni Debata di hita di Minggunta sadari on, i ma na tarsurat di Confessi HKBP Bindu 12 Taringot tu Ulaon dohot haporseaon. (Dijahahon Liturgis). I ma sahatna. Antong rap mangidohon ma hita tu Tuhan Debata mangulahon patikNa i.
H:  Ale Tuhan Debata sai pargogoi ma hami mangulahon patikMi. Amen.
05.  Marende No. 427: 1 + 4 “Marserep marunduk ni roha”
           1.   Marserep marunduk ni roha, ro au tu joloM Tuhanki. Hubege pandokMu, panjouMu,              tung i do papos rohangki. Dihophop Ho au Tuhan. Dilehon Ho do hosaM, pasaehon                 dosangku sude. Sai togu rajai hami be. Jongjong 
4.   Urupi au on Tuhanku. Pagomos rohangku tongtong. Sai suru tondiM nabadia, pangolu pasonang au on. Dihophop Ho au Tuhan. Dilehon Ho do hosaM, pasaehon dosangku sude. Sai togu rajai hami be.
06.  manopoti Dosa dohot Manjangkon bagabaga ni Debata:
L:    Hamuna angka dongan sahaporseaon! Tatopoti ma dosanta tu adopan ni Tuhanta Pardenggan basa i.
    ~~ Martangiang na hohom diiringi orgel BE. No. 212 saayat ~~
L:    Ale Tuhan Debata! Pargogo na so hatudosan jala Amanami! Hujou hami do goarMu na badia i, ala na targogot situtu hami di dosanami i. Ho do na patupahon hasesaan ni dosa di hami halak na dangol on marhite Anak haholongan ni rohaM Jesus Kristus Tuhannami. Asi ma rohaM di hami, angka na mangarsakhon dosanami. Sesa ma saluhut dosanami na godang i. 
A:    Ale Tuhan! Sai marasi ni roha ma Ho mida hami pardosa godang on.
I:     O Tuhan Jesus Anak ni Debata na gabe jolma ala ni hami, na mate jala na hehe sian angka na mate, na manaek tu banua ginjang mangondihon hami.
PESERTA SIDI:           
Ale Tuhan! Asi ma rohaM di hami, sai patongtong ma di hami roha hamauliateon tu Ho.
L:    O Tondi Parbadia! Pangapul di na marsak roha, pamalum ma saluhut na bernit, binahen ni dosanami! Ro ma Ho mangingani hami, asa marlas ni roha hami mangulahon lomo ni rohaM.
H:   Ho do parhitean ni na sa asi ni roha, sai unang tulak hami Tuhan. Sai tangihon ma hami, Ho ale Debata Ama, Anak dohot Tondi Parbadia.
PESERTA SIDI:
Ro do hami tu adopanMu ale Tuhan! Tangihon ma tangiangnami. Ajari ma hami marhamubaon ni roha, asa tarpatulus hami lomo ni rohaM.
L:    Nunga marroha pamuation Debata mida hita jolma pardosa. Tatanda ma hahuranganta maradophon Debata nang maradophon donganta jolma pe. Antong! Taendehon ma sian nasa rohanta pangaramotion ni Tuhanta di ngolunta:“Dinatargogot au hansit huae, Ho na mangapul au tu Ho au lao......”! 
S:    Mangendehon BE No. 223: 3 + 4  “Husomba Ho Tuhan”
3.   Di na targogot au, hansit huae, Ho na mangapul au, tu Ho au lao; Haposanki do Ho, Ho Sipangolu do, sai lam gandai holong tu Ho. 
4. Ia tung jumpang ma Ro ajalhi, Asi rohaM na ma di tondingki. Na las do rohangki, Marnida bohiMi di lambungMi di surgo i. 
L:    Hamuna angka dongan na hinaholongan ni Tuhan Jesus! Tajangkon jala tahangoluhon ma bagabaga ni Debata taringot tu hasesaan ni dosanta: “Molo tung adong manang ise na mardosa, adong do pangondianta di Ama i, i ma Tuhanta Jesus Kristus na tigor roha i. Jala Ibana do Pardengganan taringot tu dosanta, alai ndada holan taringot tu dosanta, dohot do taringot tu dosa ni portibi on”. Hasangapon ma di Debata na di ginjang.
S:    Amen. ~~~~Hundul ma hita~~~~~
07.  Marende No. 763: 1 - 2 “Molo Jesus donganmi las roham”
1. Molo Jesus donganmi las roham, Jesus i pangurupim las roham, hot haporseaonmi dohot pos ni rohami. Mardonganhon Jesus i, las roham. Ref. Las roham, las roham, mardonganhon Jesus i las roham, marsinondang ma di ho, Bintang panghirimon i, mardonganhon Jesus i las roham.
2.   Molo Jesus donganmi las roham, jagaonNa tondimi las roham, tiruonmu ma tongtong, Dame nang holongNa i, saleleng dingolumi las roham. Las roham, las roham.......!
08.  Epistel: 1 Petrus 2: 21b - 25
L:   Hamuna angka dongan! Tajaha ma turpuk Epistel di Minggunta sadari on, i ma na tarsurat di 1 Petrus 2: 21b - 25, na mandok: “Ai dohot do Kristus manaon na porsuk humongkop hamu, tumadingkon tiruan di hamu, asa diihuthon hamu bogas ni patna:
H:  "Ndang adong dosa diula Ibana; ndang jumpang angkal di bagasan pamanganna."
L:   Ndang manginsahi Ibana, di na hona insak, ndang mangasupi, di na manaon na porsuk; alai dipasahat do tu Panguhum sitigor roha i.
H:  Diporsan Ibana do dosanta di bagasan dagingna tu hau i, asa malua hita sian dosa, gabe mangolu di hatigoran i: "Hinorhon ni bugangna i do gabe malum hamu."
S:  Ai songon birubiru na lilu do hamu najolo; alai nunga didompakkon hamu nuaeng Parmahan i, na manganahon tondimuna.
L:   I ma sahatna. Martua ma na manjaha dohot na tumangihon Hata ni Debata, lumobi ma na mangulahonsa sian na sa rohana di bagasan Tuhan i.
S:  Amen.
09.  Marende No. 453: 2 – 3 “Sada Goar naumuli”
2. Tung na malum do rohangku, nunga sonang tondingki. GoarMi do sinjatangku dompak angka musu i. GoarMi, Tuhanki.....!
                              ~~~Jongjong ma hita~~~
 3.   Sipalua do goarMu, saut malua tondingki. Nasa rante ni sibolis, ingkon sega baenonni. GoarMi Tuhanki......!
10.  Manghatindangkon Haporseaon:
L:  Hamuna dongan sahaporseaon! Tahatindanghon ma haporseaonta i rap dohot donganta sahaporseaon di sandok portibi on, Rap ma hita mandok:
S: Ahu porsea.......”! ~~~Hundul ma hita~~~
11.  Tingting Na Masa (Warta Jemaat)
12.  Marende No. 691: 1.... “Hupasahat ma tu Jesus”          (Pel Ia & Ib)
    1. Hupasahat ma tu Jesus, saluhutna ngolungki, roha nang pam-bahenanku, saluhutna tingkingki. Ref. Hupasahat ma tu Jesus, saluhutna diringki, hupasahat ma tu Jesus, saluhutna ngolungki. 
2. Pangkeonku ma tanganku, mangula lomoNa i, langka nang simanjojakhu mangihuthon Tuhanki. Hupasahat ma tu Jesus.....! 
3. Nang pamereng ni matangku, mandompakhon Jesus i, soara ni pamanganku, mamuji goarNa i. Hupasahat ma tu Jesus.....!
4. Dung huida Tuhan Jesus, hutundalhon dosangki, lohot rohangki tu Jesus, Sipalua tondingki. Hupasahat ma tu Jesus.....!
    
13. Jamita: Hesekiel 34: 11 - 19       
14.  Marende No. 714: 1 - 4 “Tuhan na marmahan hami” (Pel II)
  1. Tuhan na marmahan hami togu hami ruasMon. Lehon dameMi di hami angka na hinophopMon. Tuhan Jesus Sipalua, Parmahani ruasMon. Tuhan Jesus Siparmahan, Parmahani ruasMon.
2. Tuhan Parmahan haposan dongan na sumurung i, sai padao pangunjunan togu ma na lilu i. Tuhan Jesus Sipalua pasupasu ruasMi. Tuhan Jesus Siparmahan pasupasu ruasMi.
3. PadanMi huingot hami na mardosa godang on. Ias burionMu hami sian haramunon on. Tuhan Jesus Sipalua, Ho nampuna hami on. Tuhan Jesus Sipalua, Ho nampuna hami on. 
4. Pabotohon ma tu hami siradotannami i, Tuhan gohi rohanami dohot haholongonMi. Tuhan Jesus Sipalua, ndang tarasam holongMi, Tuhan Jesus Sipalua, ndang tarasam holongMi.
15.  ACARA MANGHATINDANGHON HAPORSEAON:
       Marende No: 150: 1 + 5 “Ndang au nampuna ahu”  
      1. Ndang au nampuna ahu, hulehon diringkon. Tu Tuhan i Rajangku, sigomgom tano on. Ai dibagasan Jesus au diida Debatangku, na pasonanghon au. ~~~Orangtua dan Peserta Sidi berdiri~~~
5.   Sai i do dohononku, ndang au nampuna au. Sai Jesus tioponku, paima sahat au. Ndang lupa au di Jesus i. Paima tos hosangku, ai sonang au disi.
Pdt:    Marhitehite goar ni Debata Ama, AnakNa Tuhan Jesus Kristus dohot Tondi Parbadia. Amen. Hamu, ale natoras ni dakdanak on, diida hamu do ianakhonmuna, haholongan ni rohamuna jongjong dison. Tama jumolo mandok mauliate hamu sadari on tu Debata ala ni sude asi ni rohaNa nasailaon, ai dipangolu do nasida rasirasa nuaeng jala sanga diboto nasida Hata ni Debata dohot dalan tu hangoluan i. Alai tama do ingotonmuna sadari on angka pambahenanmuna tu angka anakhon-muna on. Ai ndang dilehon Debata angka dakdanak on tu hamu, asa adong dongan-donganmuna mangula ulaon sambing, alai asa ditogu jala diajari hamu do nasida mangihuthon Hata ni Debata, i do umbahen na dilehon. Ditangiangkon hamu do ganup ari ianakhon-muna on nasailaon, asa unang mago nasida? Molo dihilala hamu nuaeng hurang ni pambahenanmuna taringot tu angka ianakhonmuna on, tama unduk hamu tu Debata manopoti salamuna.
Martangiang ma hita! 
Ale Amanami, Ama ni nasa na targoar Ama di banua ginjang dohot di tano on! Sai tangihon ma tangiangnami on, jangkon ma angka dakdanak on gabe ianakhonmu! Asi ma rohaM, lehon ma Tondi Parbadia i tu rohanasida, asa gabe siseanMu nasida rodi saleleng ni lelengna. Molo tung na hurang pambahenannami nasailaon tu nasida, sai sesa ma i, sai unang ma targasip nasida, jala unang loas mago manang ise sian nasida binahen ni pangalahonami i. Asi ma rohaM, sahat tu tanganMu ma nasida marhitehite AnakMu Tuhan Jesus Kristus Tuhannami. Amen.

Marende No: 148: 3 “Sian surgoi suru TondiM”

Na malua be hami on sude, ala ni urupi hami, Ale Jesus Tuhannami, asa sai tongtong burju hami on. (Orang tua duduk – Peserta sidi tetap berdiri)


Pdt:    Hamu angka dakdanak na hinaholongan ni Debata! Na jongjong do hamu nuaeng di jolo ni Debata, na mamereng torus tu bagasan rohamuna, dohot di jolo ni Huria on. Nunga diboto hamu lomo ni roha dohot sogo ni roha ni Debata, ndang tarbahen hamu be marsidalian sogot di ari paruhuman i. Molo ingot rohamuna di angka ari ni ngolumuna naung salpu i, tama mandok mauliate hamu tu Debata ala ni sude asi ni rohaNa. Jala molo diingot hamu angka pambahenanmuna na so ture, i ma neang dohot langgus ni rohamuna tu natorasmuna, ro di saluhut dosamuna, tama marsak be hamu sadari on marningot i. Boan hamu ma luhutna i tu Tuhan Jesus, asa disesa i ala ni mudarNa, na use humophop pardosa na manopoti dosana. Alai pauba hamu ma rohamuna, huhut pungka hamu ma parange na imbaru olat ni sadari on, asa dalananmuna dalan na gogot i, na marhapatean tu hangoluan sisalelenglelengna.
Antong alusi hamu ma na husungkunhon on tu hamu di jolo ni Debata dohot di jolo ni angka dongan na pungu dison:
1.  Diparhatutu roham do Hata ni Debata, na ginuruhonmu nasailaon holan i do dalan tu hangoluan i?
                 ALUSNA: DIPARHATUTU ROHANGKU DO
2.  Olo do ho sian nasa roham tumundalhon saluhut dosa jala olo do ho tu joloan on mangihuthon Hata ni Debata ro di hasusuda ni bohalmu?
                 ALUSNA: NA OLO DO AHU
3.  Olo do ho manghangoluhon haporseaon na sintong i, na hinatindanghon ni Huria Protestant songon na tarsurat di Padan Na Robi dohot di Padan Naimbaru?
                 ALUSNA: NA OLO DO AHU
Doa Bersama Peserta Sidi:
Ya Bapa dan Allah kami yang di sorga! Berilah Saya Roh Kekuatan untuk mempersembahkan hidup Saya bagiMu yang Kudus selama Saya hidup di dunia ini. Materaikanlah semua FirmanMu yang Saya pelajari selama ini, dan ajarilah Saya melakukan segala yang kujanjikan di hadapanMu dan di tengah GerejaMu ini. Sempurnakanlah pekerjaan yang Tuhan mulai di dalam hati dan jiwa Saya. Peliharalah Saya senantiasa, agar jangan binasa. Bimbing dan tuntunlah Saya untuk memperoleh kehidupan yang kekal melalui AnakMu Yesus Kristus Tuhan kami. Amin.
Pdt: Antong! Hatindanghon hamu ma jolo haporseaonmuna i.
Peserta Sidi: Ahu porsea….dst!  
Pdt:    PENEGUHAN SIDI – BERKAT DIATUR TERSENDIRI (Setelah peneguhan sidi selesai semua peserta sidi berdiri)
Pdt:    Hamuna angka na pinarhamaol ni Debata, nunga gabe dongan sahuria jala dongan sapanganan hamu manganhon Parpadanan Nabadia i. Na arga situtu do hamu ditobus, unang oloi hamu be dosa dohot Sibolis. Ramotan ni Debata do hamu maralohon pangago i, asal ma tongtong rohamuna tu Ibana jala togihononNa do hamu masuk tu Harajaon banua ginjang i.  
Martangiang ma hita: Ale Amanami na di banua ginjang, asi ma rohaM di nasida angka na pinasahat nuaeng tu Ho! Sai ramoti ma nasida marhite-hite Tondi Parbadia, sai pahot ma nasida di bagasan padan naung niolohonnasida. Sai parbadia ma nasida di bagasan HataM, asa tarida haporseaonnasida tu joloan on marhitehite parange na denggan i. Amen.
16. Marende No: 149: 1 - 4 “Ho tongtong ihuthononku”
      1.   Ho tongtong ihuthononku Jesus Sipangolu au. Tung na so tading-hononku Ho napaluahon au. Sian sasude dosangku dohot sian uhum i. Natongtong habiaranku ala pardosaonki.
                                    ~~~ Jongjong ma hita saluhutna~~~~~
4.   Sai ingani ma rohangku, Jesus dohot tondiMi; Ro di ujung ni langkangku, togu au o Tuhanki. Di na tos muse hosangku, di na homur matangki. Sai tiopi ma tanganku, togu au tu lambungMi.
17. Tangiang Panutup: Pelean – Ale Amanami – Pasupasu –
           
Amen 3 X diendehon.   

Tidak ada komentar:

Poskan Komentar